Qostanaı oblysynda oryn alǵan alapat órt umytyla qoıǵan joq. Úısiz qalǵandardy baspanamen qamtamasyz etý maqsatynda bıýdjetten 2,3 mlrd teńge qarajat bólingen bolatyn. Jýyrda turǵyndarǵa jańa páterdiń kilti tabystalmaq.
El qazynasynan bólingen qarjydan bólek, «Qazaqstannyń Halyq Banki» AQ zardap shekken ár otbasyǵa 1 mln teńge qarajat berip, jalpy quny 4,7 mln teńgege teń nesıe bereshegin esepten shyǵardy. «Qaıyrymdylyq KZ» qoryna 1 243,1 mlrd teńge qarjy túsken. О́rtten japa shekken 91 otbasynyń árqaısysyna 1 mln teńgeden, jartylaı zardap shekken 74 otbasyǵa 500 myń teńgeden úlestirilipti. Bolat О́temuratov qory 91 otbasyǵa 1 mln teńgeden kómek kórsetti.
Endi úı qurylysyna toqtalsaq. Qostanaı oblysy ákimdiginiń málimetinshe, turǵyn úılerdiń sáýleti birdeı. Árqaısynyń kólemi 100 sharshy metrge teń. Bir úıdiń quny – 18,3 mln teńge. Qurylys jumystaryna 16 merdiger tartylǵan.
– Ár úıge 10 sottyq jer bólindi. Úıler tórt bólmeli, qala berdi, ashana men sanıtarlyq torap bar. Baspana sý, jaryq, gaz, jylytý júıesi sııaqty qajetti ınjenerlik ınfraqurylymmen qamtylǵan. Ár úıge qýaty myqty qazandyqtar tartyldy. Ájetqudyqtary bólek. Árqaısysy Wi-Fi ınternet jelisine qosylady, – deıdi oblystyq qurylys, sáýlet jáne qala qurylysy basqarmasynyń basshysy Berik Tańjaryqov.
Aýlada sport alańdary qarastyrylǵanyn da atap ótken jón. Jalpy, atalǵan aýdanda fýtbol, voleıbol alańdary jáne úsh balalar alańy boı kótermek. Buǵan deıin atalǵan aýdanda mundaı ıgilikter bolmaǵan. Qurylys jumystary demeýshiler esebinen qolǵa alynbaq.
Búginde úılerdi jekege berý boıynsha qujattama jumystary jalǵasyp jatyr. Turǵyndar jańa úıleriniń bosaǵasyn attaýǵa asyq. «Úıimiz órtenip, jyldar boıy tirnektep jınaǵan zattarymyz otqa orandy. Bastysy – basymyz aman. Otandastar qıyn sátte barynsha qoldaý kórsetti. El tizginin ustaǵan azamattar da iskerligin tanytty. Jýyrda jańa úıge kiremiz. Bul kúndi asyǵa kútip júrmiz», deıdi Jumagúl Rahmetova.
Aıtpaqshy, 1 qarashadan bastap orman sharýashylyǵy qyzmetkerleriniń jalaqysy óspek. Qyzmetkerlerge 700-ge jýyq arnaıy kıim-keshek satyp alynǵan. Jańa 14 traktor qatarǵa qosylǵan. Búginde Áýlıekól aýdanyndaǵy orman qoryn qalpyna keltirý jumystary jalǵasyp jatyr. Bul iske 7 brıgada (63 adam, 21 traktor) jumyldyrylǵan.