Kóktem men jazǵa qaraǵanda qońyr kúz túrli-tústi kórinedi. Onyń boıynda kóktemniń de, jazdyń da qasıetteri bar. Sol sııaqty Astananyń keshi de ár tústi, ár tarapty. Bir shette opera men balet qoıylyp jatsa, ekinshi jaǵynda Roza Baǵlanova atyndaǵy «Qazaqkonsertte» áldebir konsert, keshter ótip jatady. Sonyń birine ótken seısenbiniń keshinde kýá boldyq. «Turan» folklorlyq-etnografııalyq ansambli «Qazaqkonsertte» «Folk&Symphony» atty kesh berdi.
Ansambldiń aty aıtyp tur, bul qazaq ónerin ǵana emes, Túrki áleminiń rýhyn mýzykamen tanytyp júrgen top. «Ertede Túrkistandy Turan desken, Turanda er Túrigim týyp-ósken» demeı me Maǵjan? Demek Turan – kúlli Túrki álemi. Onyń baı murasyn, otty kúılerin dombyra men qobyzda, jetigen, sazsyrnaı men sybyzǵy, taǵy basqa ulttyq aspaptarda, zamanaýı nusqada tyńdaý ǵajapqa qaldyrady. О́zgeshe kúıge bólep, kókeıge kóshpeliler órkenıetiniń rýhyn qondyrady. Mýzykanyń tili ejiktep túsindirýdi qajet etpeıtin tilsiz til. Sondyqtan atalǵan ansambl oryndaýyndaǵy kúı-áýender Turan topyraǵynda óngen bizge tóltýma, al sheteldikterge tańsyq. О́tken zamannyń ózinde Maǵjan «Turandy maqtamaımyn tipti tekke, onsyz da Turan málim talaı shetke» degenindeı, bizdiń ansambl búginde shetelderde kóbirek tanymal. Osy ýaqytqa deıin 70-ten astam elde 600-den astam konsert bergen turandyqtar keshin túrki jurttaryna tanymal noǵaı jyraýy Arslan Sultanbekovtiń «Dombyra» týyndysymen ashty. Kompozısııanyń ózeginen joıqyn rýh, alapat sezimder tasqyny qylań beredi. Osyǵan japsarlas oryndalǵan «Búrkitti» de álgindeı rýhtaǵy dúnıe dep qabyldadyq. Qazaqtyń qylqobyzy qasqyr bop ulyǵanyn, aqqý bop suńqyldaǵanyn estigen edik. Bul joly búrkitteı shańqyldap shyǵa kelgende jáne oǵan daýylpaz syndy aspaptar qosylǵanda, jigerlendirmeı qoımaıdy. Qııalyńa qyrannyń qanatyn berip ushyrady.
Áıgili Ketbuqanyń «Aqsaq qulan» kúıiniń 20-ǵa jýyq nusqasy bar. Bir-birine etene bári. «Turan» ansambli ony ózderinshe qubyltyp, kúı ańyzyn jaǵalata otyra oryndaıdy eken. Daýylpaz, dabyl syndy rýh kóteretin aspaptar úni qaptaldas shyǵady. Ansambl qazaqtyń ulttyq aspaptarynyń kóbiniń daýysyn ornymen sabaqtastyra alǵandyǵymen de erekshelenedi. Bul rette kemi joq. Máselen, úsh ishekti dombyra men jetigen, sybyzǵy men sazsyrnaı qalaı qabyssa, uryp oınalatyn ulttyq aspaptar men shańqobyz, taıtuıaq ta dombyra men qobyzdyń únin odan saıyn rýhtandyryp jiberedi. Al sahnany tutasymen alyp turǵan úlken ekranda júrip jatqan beıneler tipten ǵajap áser syılaıdy.
Budan bólek ansambl E.Rahmadıev atyndaǵy memlekettik akademııalyq fılarmonııanyń sımfonııalyq orkestrimen birigip birneshe shoqtyqty týyndylardy sátti oryndaı aldy (dırıjeri – Erlan Nurtazın). Olarmen birlese Aqtoty Raıymqulovanyń «Tolǵaý», «Qazaq eli», «Dala syry» atty kompozısııalaryn oınap shyqty. «Qara jorǵaǵa» kelgende dırıjer ıyǵyn qomdap bılep ketkende, tyńdarman turyp qol soqty. Konserttiń qalaı ótip, aıaqtalǵanyn osydan-aq paıymdarsyz, endeshe.