Ulttyq akademııalyq kitaphanada shyǵystanýshy, Mysyrdaǵy mámlúkter tarıhyn zertteýshi Qaırat Sákıdiń «Sultan Baıbarys», «Er qarýy – bes qarý» jáne «Iýrta na vershıne pıramıdy» atty úsh kitaby tanystyryldy.
Oıly oqyrmanǵa jol tartqan jańa jınaqtarda shyǵystanýshynyń tarıhı derekterdi túpnusqadan paıdalanyp, arab jylnamashylarynyń shejirelik jazbalary men batys orıentalısteriniń tujyrymdarynan mol málimet keltirgen. Ásirese bala kúninde qypshaq dalasynan tutqynǵa alynyp, jat jerde eren erligimen quldyqtan qaıratkerlikke kóterilgen Baıbarys sultannyń taǵdyry men batyrlyǵy, qaısarlyǵy, aqyldylyǵy, myrzalyǵy basynan keshken qyzyqty oqıǵalarmen sheber jazylǵan. Álemniń jeti keremetiniń biri pıramıdalar ústinde mámlúkterdiń kıizúı tikkeni jónindegi tyń málimetke de qanyǵasyz. Sondaı-aq «Er qarýy – bes qarý» atty tirkestiń astarynda babalarymyzdyń jeke qarý túrin qalaı qoldanǵanyn mámlúkterdiń áskerı traktattary men qazaq aýyz ádebıeti úlgilerinde saqtalǵan materıaldar negizinde baıandaıdy.
Jıynda belgili ǵalym, qalamger, Parlament Májilisiniń depýtaty Saýytbek Abdrahmanov avtordyń izdenimpazdyǵy men baıbarystanýdaǵy eńbegine zor baǵa berip: «Bul jaǵynan kelgende sizdiń aldyńyzǵa túsetin maman joq. Siz sultannyń esimi «Beıbarys» emes «Baıbarys» ekenin ǵylymı turǵydan dáleldep berdińiz», dese Parlament Májilisiniń depýtaty Darhan Myńbaı zerdeli zertteýshiniń bireýdiń jazǵanyn aýdaryp emes, túpnusqamen tikeleı jumys isteıtinin atap ótti. Al qoǵam qaıratkeri Sársenbaı Eńsegenov avtordyń bıyl mamyr aıynda Atyraý jurtshylyǵymen kezdesip, ol jaqtan úlken ásermen oralǵanyn tilge tıek etti. Sonymen qatar basqa da zııaly azamattar arabtanýshynyń irgeli ǵylymı eńbekterine toqtalyp, oı-pikirlerin bildirdi.
Mazmundy is-shara sońynda Qaırat Sákı jańa kitapqa engen dúnıeleri týraly sóz qozǵap, aldaǵy jyly sultan Baıbarystyń týǵanyna 800 jyl tolatynyn aıtyp, jınalǵan qaýymnyń parasatty pikiri men jyly lebizine rızashylyǵyn jetkizdi.