Qostanaıda qazaq ádebıetiniń aptalyǵy ótti. Tobyl tórinde kópten beri bolyp kórmegen aýqymdy rýhanı is-sharany ádebıetsúıer qaýym óńirdiń mádenı ómirindegi úlken oqıǵa retinde qabyldady. Aptalyq aıasynda ult ustazy Ahmet Baıtursynulynyń ádebı murasyna arnalǵan ǵylymı konferensııa, jergilikti qalamgerlerdiń kitap kórmesi, syrshyl aqyn Syrbaı Máýlenovtiń 100 jyldyǵyna arnalǵan ádebı kesh, kemel jazýshy Tólen Ábdikpen kezdesý, sondaı-aq aldyńǵy aǵa býyn men qaýlap ósip kele jatqan keıingi jas aqyndardyń shyǵarmashylyǵyna arnalǵan poezııa festıvali ótti.
«Jyrlaıdy jan júregim jaqsylyqty» atty festıvaldi oblystyq mádenıet basqarmasy men Jazýshylar odaǵynyń jergilikti fılıaly birlesip uıymdastyrdy. I.Omarov atyndaǵy qazaq drama teatrynda ótken poezııa keshinde Qostanaı, Arqalyq qalalary men shalǵaı aýyl-aýdandardan kelgen ekpini erek jas shaıyrlar Serikbaı Ospanov, Aqylbek Shaıahmet syndy belgili aqyndarmen qatar turyp jyr oqydy. Jastardyń arasynda esimderi búginde el kólemine tanylyp qalǵan Abylaı Maýdanov, Janna Erekına, Jandos Júsipbek, Dáýlet Jadyrasyn, Batyrlan Saǵyntaev syndy talantty aqyndar bar.
– Bıyl Qostanaıdyń qońyr kúzinde bastalǵan ádebı aptalyqtyń aıasynda ádebıet ǵylymynyń ustynyn qalyptastyryp, sara jol salyp bergen ult ustazy Ahmet Baıtursynulynyń murasyna kóbirek kóńil bólindi. Ádebı aptalyq aıasyndaǵy is-sharalardyń bári negizinen bıylǵy Balalar jylyna oraılastyrylyp, mektep oqýshylary men stýdent-jastarǵa arnalyp otyr. Basty maqsat – asyl sózdiń qadir-qasıetin jastarǵa uǵyndyrý, ult ádebıetiniń injý-marjandaryn keıingi urpaqqa nasıhattaý, olardyń kórkem dúnıege degen yqylas-peıilin oıatý. Al endi búgingi poezııa keshine jas býyn, orta býyn jáne aǵa býyn qatysýda jáne negizgi basymdyq jas býynǵa berilip otyr. Osy keshtiń negizgi leıtmotıvi de jastar poezııasy. Keshe Tólen Ábdiktiń shyǵarmasy jelisimen «О́telmegen paryz» spektakli qoıylyp, qalamgerdiń «Adaldyq alańyndaǵy báıterek» atty shyǵarmashylyq keshi ótti, – dedi Qazaqstan jazýshylar odaǵy fılıalynyń tóraǵasy Januzaq Aıazbekuly.
Poezııa merekesine eshbir resmı shaqyrýsyz-aq kelgen jurttyń kóptigi kóńil súısintti. Teatrdyń úlken zaly lyq tolyp ketti. Kesh barysynda jas aqyndar oqyǵan óleńderge eltip, birneshe stýdent ózdiginen suranyp sahnaǵa kóterilip, jyr oqydy.
Jyr festıvalin halyq aqyny Ásııa Berkenovanyń «Tabaldyryq» atty óleńin naqyshyna keltirip jatqa oqyp bergen oblystyq mádenıet basqarmasynyń basshysy Erlan Qalmaqov túıindedi.
– Jalpy, bizdiń óńirde qaı kezde bolmasyn, jeke aqyn-jazýshylardyń shyǵarmashylyq keshterin, mereıtoılaryn uıymdastyryp, kezdesýler ótkizip turý aınymas dástúrge aınalǵan. Biraq mundaı ádebı aptalyq Tobyl-Torǵaı óńirinde tuńǵysh ret ótip otyr. osy bir aptanyń tóńireginde Ahmet Baıtursynuly, Muhametjan Seralın, Syrbaı Máýlenov, Tólen Ábdik syndy alyp tulǵalarymyzdyń shyǵarmashylyǵyna arnalǵan keshterdi, is-sharalardy ótkizdik. Búgingi poezııa keshi de endi jyl saıyn ótip turatyn dástúrli is-sharalarymyzdyń tizimine enetin bolady, – dedi basqarma basshysy.
Qostanaı oblysy