Almaty aspanynda Respýblıka kúni qarsańynda eń úlken baıraq jelbiredi, Álemdik rekord ornatqan kásibı parashıýtıst Qazaqstan Respýblıkasynyń eń úlken memlekettik týymen sekirdi.
Baıraqtyń kólemi 800 sharshy metr boldy (salystyrý úshin: Astanadaǵy bas flagshtoktaǵy baıraqtyń kólemi – 450 sharshy metr). Tý osy erekshe oqıǵa úshin arnaıy daıyndalyp, nátıjesinde, Qazaqstannyń rekordtar kitabyna endi. Parashıýtıst sekirgen bıiktik 3 000 metrdi qurady, bul – taýdaǵy eń ataqty Shymbulaq shıpajaıynan da bıik.
«Búgin biz Almaty aspanynda memlekettik baıraǵymyz túrindegi shynaıy sýretke kýá boldyq. Men osy sátti kózimmen kórip, elimniń yntymaǵy men asqaqtyǵynyń rýhyn seziný baqytyna ıe boldym», deıdi Qazaqstan rekordtar kitabynyń ókili Qýandyq Qudaıbergenov.
Is-sharany uıymdastyrǵan kásipker Jomart Qııastyń aıtýynsha, bul naýqannyń maqsaty – barsha qazaqstandyqtyń patrıottyq rýhyn kóterý, sonymen birge ultyna, dúnıetanymyna qaramastan bir-birine tózimdilik tanytýdy dáripteý.
«Qazaqstan – tynyshtyq pen beıbitshilik mekeni, muny barlyq halyqaralyq qaýymdastyq ókilderi rastaıdy. Eń úlken baıraqtyń aspanda qalyqtaýynda tereń mán bar, ol ashyq aspan astyndaǵy elimizdegi barlyq halyqtyń yntymaǵyn bildiredi», dedi mesenat.
Sharanyń urany bolǵan «Ashyq aspan» degen sózde tutastyq, qazaqstandyqtardyń beıbit aspany degen mán jatyr. Bul sóz beıbitshilikti qorǵaýdy, el turǵyndarynyń baqýatty ómiriniń baıandy bolýyn nasıhattaıdy.
Áleýmettik sharany sonymen birge Eskendir Ibragım, Temir Spataev, Aljan Darmenov, Toıbek Myrzabekov, Ardaq Nazarov, Janqosh Turarov syndy azamattar qoldady.