Qaraǵandyda Respýblıka kúnine oraı saltanatty jıyn ótip, onda aımaqtyń damýyna úles qosqan birqatar qaraǵandylyqqa memlekettik nagradalar tapsyryldy. Marapatty Memleket basshysynyń atynan oblys ákimi Jeńis Qasymbek tabys etti. Saltanatty quttyqtaý sózben ashqan oblys ákimi eń áýeli aǵa býynǵa aqjarma tilegin bildirdi. Olardyń táýelsizdik tuǵyryn nyǵaıtýdaǵy ólsheýsiz eńbegine toqtaldy.
– Elimizdiń órkendeý jolyndaǵy óńirdiń árbir turǵynynyń úlesin maqtanyshpen jáne asqan qurmetpen atap ótkim keledi. Ásirese, ardagerler qaýymyna sheksiz rızashylyǵymdy bildiremin. О́z isine adaldyqtyń úlgisin kórsetken sizderge bas ıemin, – dedi Jeńis Qasymbek.
El Prezıdentiniń Jarlyǵymen memlekettik jáne qoǵamdyq qyzmettegi eńbegi, eldiń áleýmettik-ekonomıkalyq jáne mádenı damýyna qosqan eleýli úlesi, dostyq pen yntymaqtastyqty nyǵaıtqany úshin Qaraǵandy oblysynyń 34 turǵyny marapattaldy. Olarǵa «Parasat», «Qurmet», III dárejeli «Eńbek Dańqy» ordeni, «Eren eńbegi úshin», «Shapaǵat» medali, sondaı-aq «Qazaqstannyń eńbek sińirgen qaıratkeri» qurmetti ataǵy, Qazaqstan Respýblıkasynyń Qurmet gramotasy tabystaldy. Marapattalǵandardyń qatarynda jumysshylar, kásiporyn-uıym basshylary, dárigerler, sportshylar jáne ózge salanyń da ókilderi bar.
– Bul – meniń ǵana emes, barlyq áriptesterimniń eńbegin baǵalaý dep bilemin. Biz, aǵa býyn ókilderi úshin Respýblıka kúni – Qazaqstan Respýblıkasy halqynyń birligi men kelisiminiń nyshany, – deıdi «Eren eńbegi úshin» medali ıegeri, Osakarov aýdanynyń eńbek ardageri «Rıabına» QB tóraǵasy Vladımır Kosheves.
Sonymen qatar saltanatty jıynda hırýrg-onkolog, medısına ǵylymdarynyń doktory, professor Qanı Musulmanbekovke, Qazaqstan Respýblıkasynyń eńbek sińirgen mádenıet qaıratkeri Rymbala Omarbekovaǵa, Qaraǵandy oblystyq olımpıadalyq rezervtegi mamandandyrylǵan balalar men jasóspirimder sport mektebiniń dırektory Anatolıı Stepanenkoǵa «Qaraǵandy oblysynyń Qurmetti azamaty» ataǵy berildi.
Qaraǵandy oblysy