Alaqandaı Aqsý aýylynda zamanaýı sport kesheni boı kóterdi. Sol kıeli topyraqtyń atymtaı jomart azamaty Aıdyn Súleımenniń demeýshiligimen salynǵan nysannyń lentasy qıyldy. Bul rásim Respýblıka kúni qarsańynda ótti. Jańa sport kesheninde 180 bala ártúrli sport túrine daıyndala alady.
Atalǵan keshenniń ashylý saltanatyna Jetisý oblysy dene shynyqtyrý jáne sport basqarmasynyń basshysy Almat Úshkempirov, aýdan ákiminiń orynbasary Ǵazız Otarbaıuly jáne aýyl turǵyndary qatysty.
Jalpy, quny 350 mln teńge bolatyn qurylys jumystaryn «Stroı montaj vektor» jaýapkershiligi shekteýli seriktestigi júrgizgen. Keshende 4 jattyǵý zaly bar desek, olar túgeldeı qajetti sporttyq jabdyqtarmen qamtylǵan. Iаǵnı aýyl balalarynyń basketbol, voleıbol, shaǵyn fýtbol, boks, ústel tennısi, toǵyzqumalaq, qazaqsha jáne erkin kúrespen aınalysýyna múmkindik jasalǵan. Nysanda bir mezgilde 180 bala sportpen shuǵyldana alady.
«Buǵan deıin balalar erkin kúresten aýyldaǵy Mamanııa mektebiniń sport zaly bazasynda jattyǵyp keldi. Olardy aýdandyq balalar men jasóspirimder sport mektebinen bólingen maman jattyqtyratyn. Endi kúrespen qatar basqa da sport túrlerine qyzyqqan balalar osy kesheniniń arnaıy zaldarynda shynyǵatyn bolady. Shtatqa jattyqtyrýshylar sport mektebinen tartylady», dedi Aqsý aýdandyq buqaralyq sporttyq is-sharalardy ótkizý ortalyǵynyń dırektory Ashat Saýǵanbaev.
Keshen jastardy salamatty ómir saltyna baýlyp qana qoımaı, ýaqytty tıimdi paıdalanýǵa, tabandylyq pen tózimdiligin shyńdaýǵa múmkindik bermek. Aqsý aýyly turǵyndarynyń ortalyqta bolashaq chempıondar ósip shyǵaryna senimderi mol.
Jetisý oblysy ákiminiń baspasóz qyzmetiniń málimetinshe, jalpy óńirde Aqsýdaǵy sport kesheninen bólek 5 sporttyq saýyqtyrý kesheni bar. Bıyl oblysta taǵy 8 sport nysanynyń qurylysy júrip jatyr. Sonyń ishinde Alakól aýdanyndaǵy Dostyq jáne Lepsi aýyldarynda dene shynyqtyrý-saýyqtyrý kesheni, Alakól aýdany Beskól aýylynda, Panfılov aýdany Úlken Shyǵan, Penjim aýyldarynda sport keshenderi salynýda.
Jetisý oblysy