Respýblıka kúni qarsańynda birqatar temirjolshy qyzmettik boryshyn úlgili oryndaǵany, tańdaǵan mamandyǵyna adaldyǵy, poıyzdar qozǵalysy qaýipsizdigin qamtamasyz etýge, jolaýshylar men júkterdi tasymaldaý qarqynyn arttyrýǵa qosqan úlesi úshin memlekettik jáne salalyq nagradalarmen marapattaldy. Olardyń ishinde «Qurmet» ordenimen «QTJ» UK» AQ – «Magıstraldyq jeli Almaty bólimshesi» fılıalynyń Úshtóbe belgi berý jáne baılanys dıstansııasy BOB ýchaskesiniń bastyǵy Erjan Jebegenov marapattaldy. Ol temirjol magıstralinde shamamen 45 jyl jumys istese, onyń ár kúni óziniń qyzmettik mindetterin óte muqııat jáne jaýapkershilikpen oryndaýmen ótti.
1977 jyly ol temirjolǵa jastaı, ıaǵnı 18 jastaǵy jigit bolyp kelip, jol dıstansııasynyń monteri boldy. Buǵan deıin onyń ómirbaıanynda tek tehnıkalyq mektepte oqyǵany jáne alańsyz balalyq shaǵy ǵana bolatyn.
– Men ómirimde temirjoldan basqa eshteńe kórgen joqpyn. Jolda týyp-óstim, ómir boıy relsterdiń arasynda júrdim. Maqtan tutamyn, óz isimdi jaqsy kóremin, ony usaq-túıegine deıin bilemin. Meniń temirjol magıstralinde ótkizgen 45 jylym bir kúndeı óte shyqty. Maǵan bir belgisiz avtordyń sózderi qatty unaıdy: «Men terezelerde tek orman bolatyn jerde óstim. Biraq aspanǵa deıin sozylyp aýany tilgen sý qysymy sııaqty, relster bir-biriniń izderin shatastyrady», deıdi «Qurmet» ordeniniń ıegeri.
Joldyń monteri retinde shamamen bir jyl jumys istegennen keıin bizdiń keıipkerimiz Keńes Armııasynyń qataryna shaqyrylyp, áskerı boryshyn ótegennen soń qaıtadan depodaǵy temirjolyna oraldy. 1980 jyly ol óziniń týǵan aýylyndaǵy Belgi berý jáne baılanys dıstansııasynda BOB elektromonteri bolyp jumys istedi. Sodan keıin Saryózek – Aınabulaq ýchaskesinde aǵa elektromehanık bolyp taǵaıyndaldy.
– Men de keremet jubaıymmen temirjolda tanystym, ol ómir boıy osynda taýar kassıri bolyp jumys istedi. Biz úsh balany – eki qyz ben uldy tárbıeledik. Meniń ákem, anam jáne barlyq baýyrlarym, jıenderim de – temirjolshylar, – deıdi Erjan Jebegenov.
Onyń ár jumys kúni tańerteń naqty josparlaýdan, alǵa mindetter qoıýdan bastalady. Sodan keıin ol oryndalǵan jumysty muqııat tekserip, kóbinese qaramaǵyndaǵy temirjolshylarmen birge kúrdeli jumystardy ózi oryndaıdy, jastardy barlyq mashyqqa úıretedi.
– Bul meniń ordenim ǵana emes, bul marapat – búkil ujymymyzdyń, basshylyǵymyzdyń eńbegi. Men taǵdyrǵa óte rızamyn, bizdiń jumysymyz óte joǵary baǵalandy. Qazir jumysta tehnıkalyq daıyndyqty uıymdastyrýdyń sapasyna basa nazar aýdaramyz, qysqy jaǵdaıda qurylǵylardyń qalypty jumysyn qamtamasyz etýdiń tehnologııalyq ádisterin, kúrdeli meteojaǵdaılardaǵy jumystyń barlyq túıtkili men ereksheligin únemi pysyqtaımyz. О́ıtkeni qashyqtyq ýchaskesi geografııalyq qıyn jerlerden ótedi, keıde aýa raıy kútpegen «tosynsyılar» týdyryp jatady, – deıdi ol.
Keıipkerimiz óz ómiriniń árbir kúnin temirjolsyz elestete almaıdy. «О́mirińizde qandaı súıikti isterińiz nemese hobbılaryńyz bar?» degen suraqqa ol «Barlyǵy tek temirjolmen baılanysty», dep jaýap beredi. Árdaıym belgili bir mindetterdi sátti sheshýge kómektesetin keıbir standartty emes tásilderdi oılap tabýǵa jáne engizýge tyrysady. Sonymen qatar Erjan Turalynuly óte qarapaıym adam, óziniń jetistikteri týraly eshqashan aıtpaıdy. Áriptesteri ǵana onyń danalyǵy, meıirimdiligi men kásibıligi týraly sóz qozǵap jatady. Mansaptyq ósýdiń ár satysynda Erjan Turalynuly sııaqty jumysqa janynyń bir bólshegin salatyn adam ǵana naǵyz temirjolshy bolsa kerek.
Daryndy basshy, tájirıbeli uıymdastyrýshy, ar-namysy joǵary, temirjolshylardyń aǵa býynynyń da, jastardyń da qurmetine ıe. Onyń aıtýynsha, Úshtóbe baılanysshylarynyń negizgi mindeti – qyzmet kórsetiletin ýchaskede poıyzdar qozǵalysy qaýipsizdigin qamtamasyz ete otyryp, BOB qurylǵylarynyń, baılanystyń senimdi jáne úzdiksiz jumysyn qamtamasyz etý. Munda jyl saıyn jańa tehnologııalardy engizý jáne qoldanystaǵy qurylǵylardy jańǵyrtý jumystary júrgiziledi. Munyń bári temirjoldaǵy qozǵalys qaýipsizdigin arttyrý úshin qajet. Bul rette, Úshtóbe belgi berý jáne baılanys dıstansııasy kóptegen jyl boıy Almaty óńiriniń eń úzdik kásiporyndarynyń biri retinde óz bedelin saqtap keledi, al osy bólimshe mamandary poıyzdardyń qaýipsiz ári úzdiksiz qozǵalysy úshin bar kúsh-jigerin aıaǵan emes.
Ásel ShAIHYNOVA