Batys Qazaqstan oblysy, Báıterek aýdanynyń Shapovo aýylynda Baýyrjan Momyshuly atyndaǵy 420 oryndyq jańa mektep ǵımaraty paıdalanýǵa berildi.
Jańa mekteptiń ashylýy Ulttyq mereke – Respýblıka kúnine tuspa tus keldi. Aýyl balalaryna bilim syılaıtyn ǵımarat qurylysy úshin memleketten 1 191,07 mln teńge qarajat bólingen. Qurylysty óńirdegi belgili kompanııa - «SKF Otdelstroı» JShS júrgizdi.
Shapovo – Oral-Atyraý kúre jolynyń boıynda jatqan iri eldimeken. Aýyldaǵy burynǵy mektep 120 balaǵa arnalǵan, ári 1974 jyly salynǵandyqtan, tozyp, apat jaǵdaıyna kelgen bolatyn. Soǵan qaramastan munda kúni 2022-2023 oqý jylynda 435 oqýshy birinshi toqsandy ylajdap oqyp shyqty. Olardyń ishinde kórshiles Jańatań aýylynan avtobýspen tasymaldanatyn 41 oqýshy da bar. Jańa mektep ǵımaratynyń ashylýyn eń asyǵyp kútken de osy oqýshylar bolǵany anyq.
Bilim ordasy 2021 jyly dańqty batyr Baýyrjan Momyshulynyń esimin ıelengen bolatyn. Sońǵy 6 jyldan beri osy ujymdy basqaryp kele jatqan Aımeken Baqtyǵalıevanyń ózi qazaq tili men ádebıetiniń muǵalimi. Aralas tilde sabaq beretin mektepte 293 oqýshy qazaq tilinde, 142 oqýshy orys tilinde bilim alady. Aýyldyń demografııalyq ahýaly óte jaqsy: qazir birinshi synypta – 40 bala oqysa, mektepaldy daıarlyq tobynda 45 sábı tárbıelenip jatyr. Mektepte barlyǵy 67 pedagog qyzmet atqarady.
Jańa ǵımarattyń ashylý saltanatyna arnaıy kelgen Batys Qazaqstan oblysy ákiminiń orynbasary Baqytjan Narymbetov aýyl turǵyndaryn qýanyshty oqıǵamen ári Ulttyq mereke – Respýblıka kúnimen quttyqtady. Memleketimiz óz halqynyń jaqsy turmysy men baıandy bolashaǵy úshin keleshekte de júıeli jumys júrgizetinin aıtty. Osyndaı zamanaýı bilim ordasynda bilim alǵan órenderdiń óz Otanyn qaltqysyz súıgen patrıot bolatynyna senim bildirdi.
Jańa mektep tolyǵymen jańa tehnıkalyq qural-jabdyqpen jaraqtalǵan. Ǵımarattyń 21 oqý kabınetinde 15 ınteraktıvti taqta ornatylǵan. Sonymen qatar, 1 smart kabınet, 2 sheberhana, 2 ınformatıka kabıneti, sportzal, kitaphana jáne 30 oryndyq oqý zaly, 208 oryndyq mádenıet zaly, 72 oryndyq ashanasy bar. Mektep aýlasynda birneshe sport alańy ornalasqan.
Mektep dańqty batyr Baýyrjan Momyshulynyń esimin ıelengendikten, munda «Baýyrjantaný» atty sabaq ta júredi. Odan bólek, mektep ujymy oqý-tárbıe úrdisine ınnovasııalyq ádis-tásilderdi batyl engizip, «Sıfrly muǵalim», «Dombyra party», «STEAM», «Eko mektep», «Oqýǵa qushtar mektep», Debat «Aqıqat» jobalarymen jumystanady. Respýblıka boıynsha Baýyrjan Momyshuly esimin ıelengen mekteptermen de jelilik baılanys ornatyp, tájirıbe almasyp otyrady.
Batys Qazaqstan