Máýlen Áshimbaev Prezıdentke Senattyń elimizdegi reformalardy zańnamalyq turǵyda qamtamasyz etý jónindegi jumysy týraly baıandap berdi, dep habarlaıdy Egemen.kz Aqordanyń resmı saıtyna silteme jasap.
Kezdesý barysynda adam quqyqtary jónindegi ýákildiń, Konstıtýsııalyq Sottyń, Prokýratýranyń qyzmetin retteıtin konstıtýsııalyq zańdardyń jobalary zerdelendi.
Prezıdentke qazirgi ýaqytta senatorlardyń qaraýynda qańtar oqıǵasyna qatysqan keıbir azamattarǵa raqymshylyq jasaý týraly zań jobasy men úsh jylǵa arnalǵan respýblıkalyq bıýdjet jobasy jatqany jóninde málimet berildi.
Máýlen Áshimbaevtyń aıtýynsha, Memleket basshysynyń óńirlerdi odan ári damytýǵa baǵyttalǵan tapsyrmalarynyń iske asyrylýyn qamtamasyz etý – Palata jumysynyń negizgi basymdyqtarynyń biri.
Prezıdent Álemdik jáne dástúrli dinder kóshbasshylary seziniń ıdeıalary men qorytyndy qujatyn odan ári ilgeriletý jáne forýmdy damytýdyń 2023-2033 jyldarǵa arnalǵan tujyrymdamasyn ázirleý jóninde tapsyrma berdi.