Respýblıka kúni qyzylordalyqtarǵa aıryqsha tartý jasady. Bir kúnde qala men oblys aýdandarynda balalar úshin 80 sporttyq oıyn alańy, Oqýshylar úıi men balabaqsha paıdalanýǵa berilip, oblys ortalyǵyndaǵy qoǵamdyq kólikter qatary 40 avtobýspen tolyqty.
Oblys ákimi Nurlybek Nálibaev turǵyndardy ulyq merekemen quttyqtap, ıgi tilegin jetkizdi.
– Ulttyq merekemiz – Respýblıka kúni qutty bolsyn! Memleket basshysynyń bastamasymen qaıta oralǵan bul kúnniń bárimiz úshin tarıhı máni joǵary, ıdeologııalyq salmaǵy erek, – dedi N.Nálibaev.
Oblys ortalyǵy turǵyndary úshin tolǵaqty máseleniń biri qoǵamdyq kólik edi. Mektepterde sabaq bastalǵaly beri kólik jetispeıtini aıqyn baıqala bastaǵan. Áleýmettik jelini ashyp qalsań, aıaldamada avtobýs kútken jurttyń jazǵan shaǵymynan kóz súrinetin. Eldi alańdatqan bul problemanyń da sheshimi tabylatyn kún jaqyn qalǵan sııaqty. Merekede qalaishilik qoǵamdyq kólikter qatary jańa 40 avtobýspen tolyqty. Buǵan deıin Qyzylorda avtobýs parkine «О́nerkásipti damytý qory» AQ arqyly jańadan lızıngke 150 avtobýs alýǵa 1,43 mlrd teńge qarjy bólinip, ótken aıda 21 jańa avtobýs jetkizilgen. Al qarasha aıynda qalǵan jańa kólikter keledi.
Qalamen qatar aýyl halqy da ıgilikten shettep qalmaýy kerek. Ásirese eldimeken balalary úshin bar jaǵdaı jasalýy qajet. Oblys ákimi Nurlybek Nálibaev Balalar jyly sheńberinde qala men aýdandarda sporttyq oıyn alańdaryn salý bastamasyn kótergen edi. Merekede demeýshiler tarapynan qoldaý tapqan osy ıdeıa boıynsha quny 1,6 mlrd teńge bolatyn 80 sporttyq oıyn alańy qoldanysqa berildi.
Osydan az kún buryn mesenattar qarjysyna Jańaqorǵan aýdany ortalyǵynda quny 790 mln bolatyn zamanaýı demalys parki, Syrdarııa aýdanynyń Naǵı Ilııasov aýylynda 350 mln teńgege «Eńbekshiler alleıasy» boı kóterdi.
Qaltaly azamattar aımaqta mektep, balabaqsha ashýǵa da yntaly bolyp otyr. Respýblıka kúninde qalada 300 oryndyq balabaqsha esigin aıqara ashty. Jyl sońyna deıin taǵy 2 memlekettik balabaqsha paıdalanýǵa beriledi. Sońǵy 5-6 aıdyń ishinde jergilikti kásipkerler 9 mlrd teńge jumsap, aýqymdy jobalardy júzege asyryp keledi.
Jalaǵash aýdanynda quny 431 mln bolatyn 200 oryndyq Oqýshylar úıi men 50 oryndyq О́ner mektebi, jańa dárigerlik ambýlatorııanyń ashylýy ulttyq mereke meziretindeı boldy. Taıaý kúnderi Aral aýdanynda 150 mln teńgege salynǵan «Balyqshylar monýmenti» men alleıa el ıgiligine beriledi.
Bıyl óńirde 4 jańa bilim oshaǵy ashyldy. Jyl sońyna deıin taǵy 8 mektep tabystalady. Aral aýdany Toqabaı aýylyndaǵy apatty dep tanylǵan mektep ornyna jeke ınvestor esebinen 500 mln teńgege bilim oshaǵyn salyp jatyr. Oqýshylar tasymaly úshin osy oqý jylynda mektepterge 30 avtobýs beriledi.
Balalar jylynan bastaý alǵan taǵy bir jańalyq – oblys ortalyǵynda zamanaýı úlgidegi Oqýshylar saraıy boı kóteredi.
Jalpy, aldaǵy 3 jylda «Jaıly mektep» jobasy boıynsha 70 mlrd teńgege 15 memlekettik mektep salý josparda tur. Onyń toǵyzynyń qurylysy keler jyly bastalady.
Oblys kásipkerleri túrik kompanııalarymen birlesip, óndiris oryndaryn ashýǵa talaptanyp jatyr. Baýyrlas el iskerleri osy jyly qalany jylý jáne elektrmen tolyq qamtamasyz etetin qýattylyǵy 240 megavatty quraıtyn jylý elektr ortalyǵynyń irgetasyn qalady. Quny 215 mlrd teńgeden asatyn joba 3 jylda aıaqtalady. Taǵy bir túrik kompanııasymen jylyna 24 myń tonna qyzanaq pastasyn shyǵaratyn zaýyt salý týraly kelissózder júrgizilýde.
Syr elinde jańa 1,6 mlrd teńgeni quraıtyn Neke saraıy, 3,7 mlrd teńge bolatyn 1000 oryndyq О́ner ortalyǵy, sol jaǵalaýdan 2,7 mlrd teńge qarjyǵa Qan ortalyǵy salynyp jatyr. Belgili kásipker, mesenat Marat Dúısenbaevtyń demeýshiligimen qurylysy bastalǵan «Anaǵa taǵzym» ortalyǵy shahardyń ajaryn asha túsedi.
О́ńir óndirisine kelgende erekshe aıta keter bir jańalyq, shyny zaýytynyń kúıdirý peshi qajetti temperatýrasyna jetip, qazan aıynyń 9 kúni alǵashqy synama shyny óndirildi. Alda zaýyt aınalasynan 8 ilespe óndiris ornyn damytý josparlanyp otyr. Zaýytta shyny-talshyqty, kompozıttik materıaldar jáne basqa da ónimder shyǵaryla bastaıdy.
Qalanyń negizgi qaqpasy áýejaı da qaıta jańarady. Bolat О́temuratovtyń tikeleı qoldaýymen quny 12 mlrd teńge bolatyn «Qorqyt ata» áýejaıynyń jańa termınaly salynýda. Osy kúni ózge de demeýshiler qarjysymen 100 mln teńgege burynǵy termınaldyń ishki jáne syrtqy árleý jumystary júrgizildi.
Densaýlyq saqtaý salasynda 2 jyl ishinde 27 jańa nysan halyq ıgiligine beriledi. Ortalyq atqarýshy organdarmen birge jasalǵan ornyqty jumystardyń nátıjesinde 36,4 mlrd teńgege Qyzylorda qalasynan kópsalaly aýrýhana men emhana turǵyndardyń ıgiligine qyzmet etetin bolady.
Aımaqta Respýblıka kúni saltanatty jıynmen qorytyndylanyp, oblystyń áleýmettik-ekonomıkalyq damýyna erekshe úles qosqan azamattarǵa memlekettik nagrada tapsyryldy.
QYZYLORDA