Elimizge súıinshilep jetkizetin jańalyqtyń kýási bolyp otyrmyz. Mádenıet jáne sport mınıstrliginen arnaýly memlekettik tapsyrys aıasynda Ult ustazy – Ahmet Baıtursynulynyń 12 tomdyq murasy jaryqqa shyqty.
Jınaqty L.N.Gýmılev atyndaǵy Eýrazııa ulttyq ýnıversıteti «Alash» mádenıet jáne rýhanı damý ınstıtýty (dırektory S.A.Júsip) men Ahmet Baıtursynuly «Til-qural» oqý-ádistemelik, ǵylymı-zertteý ortalyǵy (dırektory R.Imahanbet) birlesip daıarlaǵan. Muny Ult ustazynyń mereıli jylyna oraı atqarylǵan aıtýly mádenı-ıntellektýaldyq eńbek deýge tolyq negiz bar.
El derbestigin aıǵaqtaıtyn qazaq til bilimi men ádebıettanýdyń san salaly zertteý jumystaryn júrgizýmen birge, Ahmet Baıtursynuly bastaǵan oqýlyq jazý úderisin ult múddesi turǵysynan jalǵastyrý, oryndaý – asa mańyzdy is. Qıyn kezeńniń ózinde zııalylarymyzdyń kırıll qarpindegi alfavıtke moıynsunbaı, dástúrli arab tekti tóte jazýdy jańǵyrtýy izdenistiń elshildik mıssııanyń basy edi. Ana tili zańdylyǵyn saf qalpynda saqtaý jolynda jalpytúrkilik (I.Ǵaspyraly) jáne ulttyq álipbı (A.Baıtursynuly) qoldanysqa endi. Muny genetıkalyq kod deýge de bolady.
Ahmet Baıtursynuly 1913 jyly «Qazaq» gazetinde: «Elimizdi saqtaý jolynda mádenıetke, oqýǵa umtylýymyz kerek. Ol úshin, eń aldymen, ádebıet tilin órkendetý kerek. О́z aldyna el bolýǵa, óziniń tili, ádebıeti bar el ǵana jaraı alatyndyǵyn umytpaýǵa tıispiz», dep jazdy. 12 tomdyqtyń ereksheligi – barlyq mura tóteshe jáne faksımılemen hattalǵan.
Atap aıtsaq, 1-tomda «Qyryq mysal» jınaǵynyń ár jyldardaǵy basylymy (1909, 1913, 1922 jylǵy) túpnusqa mátini negizinde usynylǵan. 2-tomǵa «Masa» jınaǵynyń 1922 jylǵy nusqanyń mátini búgingi jazýǵa sol qalpynda qoparylyp berilgen. Jınaqtyń ekinshi bólimine aǵartýshynyń orys, qazaq tilinde jaryq kórgen maqalalary hronologııalyq tártippen toptastyrylǵan. 3-tomǵa «Oqý quraly: qazaqsha əlippe» (1912), «Əlip-bı» (1926) atty oqýlyqtary jəne osy oqýlyqtardyń keıingi basylymdarynyń faksımılesi berilgen. Oqý-aǵartý máseleleri kótergen túrli taqyryptaǵy maqalalary engen. 4-tomǵa «Til-qural» jınaǵynyń birinshi, ekinshi, úshinshi jyldyq kitaptary toptastyrylyp, faksımıleleri berilgen. 1913-1914 jyldar aralyǵyndaǵy maqalalarynyń keıbiriniń telnusqalary jınaqtalǵan. 5-tomǵa «Oqý quraly: qazaqsha alfbaǵa baıanshy» (1921), «Saýat ashqysh» (1926), eresekterge arnalǵan «Oqý quraly» oqýlyǵynyń 1-kitaby (1921) jəne osy oqýlyqtardyń keıingi basylymdarynyń faksımılesi usynylǵan. Tatardyń «Shýra» jýrnalyndaǵy, «Qazaq» gazetiniń 1914-1915 jylǵy sandaryndaǵy oqý-aǵartý máselelerine qatysty maqalalary toptastyrylǵan. 6-tomǵa «Sharýalyq ózgeris» qoljazbasy, «MOPR hám Kúnshyǵys elderiniń eńbekshileri», «Soǵys qaýpi jáne jumysker tabynyń mindeti» atty aýdarmalary alǵashqy ret usynylyp otyr. Sondaı-aq 1916 jyly túrli taqyryptaǵy maqalalary engen.
7-tomǵa «Er Saıyn» atty eńbeginiń 1923 jylǵy nusqasynyń mátini búgingi jazýǵa qaz-qalpynda qoparylyp, faksımılesi oń qaptalyna berilgen. Sonymen birge 1924 jylǵy «Qazaq bilimpazdarynyń tuńǵysh sıezi» jáne alýan taqyrypty kótergen maqalalary toptastyryldy. 8-tomǵa «23 joqtaý» atty eńbeginiń 1926 jylǵy nusqasy faksımılesimen usynylǵan. 1915-1918 jyldardaǵy alýan taqyrypty kótergen maqalalary toptastyrylǵan. 9-tomǵa «Ádebıet tanytqysh» zertteýiniń 1926 jylǵy nusqasy faksımılesimen berilgen. Al 10-11-tomǵa Teljan Shonanulymen birlesip, 1927 jyly jarııalaǵan «Oqý quraly» atty kitabynyń mátini faksımılesimen usynylǵan. 12-tomǵa «Til-jumsar» atty ádistemelik quralynyń I, II kitaptarynyń mátini faksımılesimen berilgen. Sonymen qatar «Álipbe aıtysy» atty (1927) jınaqqa engen «Arab álip-bıin jaqtaǵan baıandamasy» jáne 1923-1929 jyldardan muraǵatta saqtalǵan alýan taqyryptaǵy qazaq, orys tilindegi maqalalary toptastyrylǵan.
Ien ǵylymı jáne rýhanı-tanymdyq baılyqty daıarlap-qurastyrýǵa qatysqandar: Raıhan Imahanbet, Sultan Han Júsip, Dıhan Qamzabekuly, Saǵymbaı Jumaǵul, Qaıyrbek Kemeńger, Abaı Myrzaǵalı, Halıl Maslov. Aqańnyń 12 tomdyq bul eńbegin Mádenıet jáne sport mınıstrligi 3 myń danamen basyp shyǵardy. Kitaptar jyl sońyna deıin elimizdiń barlyq óńirindegi kitaphanalarǵa jetkiziledi.