Pavlodar qalasynda qaıǵyly jaǵdaı boldy. Akademık Sátbaev kóshesindegi kópqabatty úıdiń aýlasynda zeınetker 40 jastaǵy azamatty atyp óltirdi. Derekkózderiniń habarlaýynsha, kúdikti jan tapsyrǵan jigittiń qaıyn atasy eken.
Oqys oqıǵa akademık Sátbaev kóshesi, 40 mekenjaıy boıynsha ornalasqan kópqabatty turǵyn úıdiń aýlasynda bolǵan. Qaıǵyly oqıǵa týraly kýágerler habarlaǵan. Oblystyq jedel járdem stansasynda er adamnyń qaıtys bolǵanyn rastady. «Oq jaraqaty týraly habarlama 15 qazan kúni, saǵat 11:43-te tústi. Jedel járdem brıgadasy shuǵyldyqtyń birinshi sanaty boıynsha shyǵyp, alty mınýtta jetti», dep habarlady jedel járdem stansasynyń baspasóz qyzmeti. Dárigerler 40 jastaǵy er adamnyń jan tapsyrǵanyn anyqtaǵan. Oq ishine tıipti.
Pavlodar qalasyndaǵy soltústik polısııa bóliminiń bastyǵy Bekzada Bólejanovtyń habarlaýynsha, oqıǵa ornynan izin sýytyp úlgergen kúdiktini jedel izdestirý sharalary júrgizilgen. Nátıjesinde, polıseıler kúdiktini Pavlodar – Omby tas jolynda toqtatyp, qolǵa túsirdi. Ol «Toıota Kamrı 70» kóligine otyryp, qaladan aýlaqqa qashyp ketýge árekettengen bolýy kerek. Quqyq qorǵaý organdary qyzmetkerlerine moıyndaý túsiniktemelerin berdi. Atalǵan fakt negizinde Qylmystyq kodekstiń 99-baby boıynsha sotqa deıingi tergeý bastaldy. Kúdikti Pavlodar qalasyndaǵy ýaqytsha ustaý oqshaýlaǵyshyna qamalyp, oqıǵanyń mán-jaıy men sebepteri anyqtalýda. Ustalǵan azamattyń jasy – 67-de, ol qaıtys bolǵan azamattyń qaıyn atasy eken.
PAVLODAR