«Barshaǵa múmkindik» qoǵamdyq qorynyń bastamasymen, Jańaózen qalasy kásipkerler qaýymdastyǵy, sport mekemeleri men jattyqtyrýshylar birlestigi, qala ákimdigi qoldaýymen Jańaózen qalasynda «Ádiletti qoǵam – Barshaǵa múmkindik» urany aıasynda arnaıy jobalar bastaldy, dep habarlaıdy Egemen.kz.
«Barshaǵa múmkindik» qoǵamdyq qory Jańaózen qalasynda 2022 jyldyń maýsym aıynan bastap qalanyń áleýmettik-ekonomıkalyq ahýalyn jaqsartýǵa kirisken. Qor qala ishinde túrli salalar boıynsha jınalǵan birneshe máseleni sheshýdi kózdeıdi. Atap aıtqanda, aýyz sý máselesi, kásipkerlik pen buqaralyq sportty damytý jáne qala turǵyndaryna arnalǵan mádenı-qoǵamdyq sharalar uıymdastyrý.
«Jańaózen qalasy elimizdiń batysyndaǵy halqy tyǵyz ornalasqan birden-bir qala. Qala halqynyń áleýeti talaı keremet jobalardy júzege asyra alatynyna jáne qalamyzdyń órkendeýine turǵyn retinde, kásipker retinde úles qosý azamattyq borysh dep sanaımyn» deıdi kásipkerler qaýymdastyǵynyń múshesi, «Ádiletti qoǵam – Barshaǵa múmkindik» urany aıasyndaǵy jobalardyń uıymdastyrýshysy, Korkem Alem kompanııasyny basshysy Temir Sákenuly.