Respýblıka kúnine oraı Ekibastuzda kópbalaly jáne tolyq emes otbasylar qýanyshqa keneldi. Jańadan salynǵan turǵyn úıden 108 otbasyǵa páter kiltteri tabys etilip, qonys toıy toılandy.
Kenshiler qalasynda «Nurly jer» turǵyn úı-kommýnaldyq damý baǵdarlamasy jáne 2025 jylǵa deıingi qalanyń keshendi damý jospary aıasynda baspana qurylysy qarqyndy júrip jatyr. Sonyń bir aıǵaǵy – ulttyq merekege oraı ıgilikke berilgen turǵyn úı. Bıyl 21-shaǵyn aýdanda 180 páterli eki turǵyn úı tapsyrylyp, 144 páterli eki úıdiń qurylysy jalǵasýda. 108 otbasyǵa buıyrǵan jańa páterlerdiń kiltin oblys ákimi Ábilqaıyr Sqaqov ózi tabys etti. Qýanyshqa kenelgender qatarynda kópbalaly analar, jetimder, áleýmettik jaǵynan az qamtylǵandar bar.
«Ekibastuzdyń keshendi damý baǵdarlamasy, onyń ishinde turǵyn úı qurylysy jalǵasyn tabady. Keıingi úsh jylda Ekibastuzda 16 kópqabatty úı salyndy, tipti bútin bir shaǵyn aýdan boı kóterdi», dep atap ótti aımaq basshysy.
Baspanaly bolǵandardyń biri – kópbalaly ana Aıdana Muhamedııanova. Tórt balany jalǵyz asyrap otyrǵan oǵan oblys ákimi turmystyq tehnıka satyp alýǵa sertıfıkat tabys etti. «Tarıhı merekede bul biz úshin aıtýly kún boldy. Prezıdent pen oblys basshylyǵynyń qoldaýymen júzdegen otbasy baspanaly boldy. Qýanyshymyzdy sózben aıtyp jetkizý múmkin emes», deıdi kópbalaly ana.
Aıtpaqshy, Ekibastuzda Respýblıka kúnine oraı jyldar boıy istemegen balabaqsha da iske qosyldy. 15 jyl boıy qańyrap bos turǵan ǵımarat 2 men 5 jas aralyǵyndaǵy balalarǵa laıyqtalǵan. Ǵımarat ishi tolyǵymen jańartylyp, zamanaýı qural-jabdyqtarmen, jıhazben qamtylǵan. Jańartý jumystaryna jalpy somasy 719,5 mln teńge jumsalypty. Eki qabatty ǵımaratta 12 jatyn bólme, medısınalyq jáne azyq-túlik bloktary, kir jýý bólmesi, mýzykalyq zal, psıholog jáne logoped kabınetteri, jylytylatyn basseın bar.
Qalalyq bilim berý bóliminiń málimetine súıensek, búginde shaharda 1 men 3 jas aralyǵyndaǵy 2 myń bala balabaqsha kezeginde tur. 3 pen 6 jas aralyǵyndaǵy balalar tolyqtaı mektepaldy bilimmen qamtylǵan.
Pavlodar oblysy,
Ekibastuz qalasy