Shahmet Qusaıynov atyndaǵy oblystyq qazaq drama teatrynda «Poıýshaıa Polonııa» atty polıak ánderiniń IV respýblıkalyq festıvali bolyp ótti. Aıtýly sharaǵa Polsha Respýblıkasynyń Qazaqstandaǵy Tótenshe jáne ókiletti elshisi Iаsek Klıýchkovskıı jáne Aqmola oblysy ákiminiń birinshi orynbasary Ráshıt Ákimov qatysyp, quttyqtaý sóz sóıledi.
Qazaqstanda óziniń ulttyq salt-dástúrlerin saqtap, beıbitqatar kún keship jatqan 32 myń polıak halqynyń basyn biriktiretin festıvalge Astana, Almaty qalalary men Aqtóbe, Pavlodar, Soltústik Qazaqstan, Qostanaı jáne Aqmola oblystarynan ókilder qatysty. «Meniń Qazaqstanym» dep atalatyn mýzykalyq-bı qoıylymymen ashylǵan festıval kórermen qaýymnyń júregine jylylyq uıalatty. Án baıqaýynda soltústikqazaqstandyq Valerııa Lopata, Vladımır Obodzınskıı, almatylyq Elena Iаvorskaıa, aqtóbelik Ilıa Sybýlskıı, qostanaılyq «Nadzeija» trıosy, astanalyq «Glosy Astany» vokaldyq toby jáne pavlodarlyq Elena Krıskaıa ánsúıer qaýymnyń erekshe qoshemetine bólendi. Al, aqmolalyq ánshilerdiń arasynan Elızaveta Rylskaıa, Valerııa Sýhoveskaıa men Janna Fılıpovıch ózindik oryndaýshylyq mánerlerimen kózge tústi.
Biz sózge tartqan «Kolorove jarmarki» dep atalatyn týyndyny tamyljyta oryndaǵan Tatıana Leonhardt týǵan halqynyń ánin bilýdi óz mindeti sanaıtynyn, mundaı sharalarǵa qatysý arqyly ózine jańa dostar taýyp qana qoımaı, sheberligin shyńdaı túsetinin alǵa tartty.
Festıvaldiń jabylý rásiminde sóz alǵan oblys ákiminiń birinshi orynbasary Ráshıt Ákimov osyndaı aýqymdy sharanyń oblysymyzda uıymdastyrylyp otyrǵandyǵyna qýanyshty ekendigin jetkizip, óńirdegi 9,5 myńǵa jýyq polıak etnosy ókilderiniń qoǵamdyq ómirdegi belsendiligine rızashylyq bildirdi. Al Iаsek Klıýchkovskıı eki el Prezıdentteriniń beıbitshilik pen kelisimdi saqtaý baǵytynda júrgizip otyrǵan saıasatyn joǵary baǵalap, búgingi sharanyń dúnıeniń eki qıyrynda jatqan qos memlekettiń yntymaqty baılanysyn jalǵastyratyn ıgi dástúrge aınalǵanyna rızashylyǵyn jetkizdi.
Baqbergen AMALBEK,
«Egemen Qazaqstan».
Aqmola oblysy.