Búgin Astanada úsh kúnge sozylǵan Astana Media Week-2022 is-sharasy qorytyndylandy, dep habarlaıdy Egemen.kz QR Aqparat jáne qoǵamdyq damý mınıstrliginiń baspasóz qyzmetine silteme jasap.
Qazaqstandyq jáne sheteldik medıa sarapshylardyń basyn Astanada qosyp, saladaǵy ózekti máselerdi talqylap, túrli master klastar uıymdastyrylǵan is-sharaǵa Memleket basshysy arnaıy quttyqtaý hat joldady. Quttyqtaýdy Aqparat jáne qoǵamdyq damý mınıstri Darhan Qydyráli oqyp berdi.
«Astana Media Week – aqparattyq yntymaqtastyqty nyǵaıtýǵa, otandyq buqaralyq aqparat quraldarynyń qazirgi qoǵamdaǵy róli men áleýetin aıshyqtaýǵa arnalǵan aýqymdy dıalog alańy.Álemdik dástúrli medıa mamandary, halyqaralyq sarapshylar qatysatyn kommýnıkasııa salasyndaǵy kezdesýler, talqylaýlar men tájirıbe almasýlar otandyq medıanyń damýyna tyń serpin beredi», dep baǵa berdi Prezıdent medıa aptalyq jumysyna.
Sondaı-aq quttyqtaýda «Aqparat salasy azamattyq qoǵamnyń qalyptasýyna erekshe úles qosyp keledi. Azamattar óz pikirin erkin jetkizip, jýrnalıster qoǵamdaǵy ózekti máselelerdi ashyq aıtady. Bul elimizde ádiletti qoǵamdy qurýǵa septigin tıgizetin mańyzdy úrdis», delingen.
Bıyl medıa aptalyq dástúrli «Úrker» ulttyq baıqaýynyń saltanatty is-sharasymen qorytyndylandy.