Oblystyq A.Pýshkın atyndaǵy kitaphanada «Muhtar Áýezov shyǵarmashylyǵy sýretshiler kózimen» atty sýret kórmesi ashyldy. Jazýshy shyǵarmalaryn oqyrman qaýymǵa nasıhattaý maqsatynda ótken kórmege qyryqqa jýyq kásibı jáne áýesqoı qylqalam sheberleri qatysty.
– Shyny kerek, burynǵydaı kitap oqýǵa jastardyń kóńili soǵa bermeıdi. Sondyqtan da sýret óneri arqyly jazýshy shyǵarmalaryn nasıhattaýdy jón dep esepteımiz. Bul joly sýretshiler M.Áýezov shyǵarmalaryn kenep betine túsirdi. Búgingi is-shara kórme ǵana emes, sýretshiler arasyndaǵy baıqaý retinde de uıymdastyryldy. Sátti sýretterdiń avtorlary baǵaly jáne aqshalaı syılyqtarmen marapattaldy, – deıdi kitaphana qyzmetkeri Merýert Kemeshova.
Aıtyp ótkendeı, Muhtar Áýezovtiń 125 jyldyǵyna oraı uıymdastyrylyp jatqan kórmege áýesqoı jas sýretshiler de qatysqan. Olar aldymen jazýshy shyǵarmalaryn oqyp baryp qoldaryna qaryndash alǵan. Biri Kókserekti beınelese, endi biri Abaı joly romanynan sıýjetter jazýǵa tyrysqan. Bul baıqaý bir jaǵynan jazýshy shyǵarmasyn nasıhattaýǵa baǵyttalsa, ekinshi jaǵynan sýret ónerin damytýdy maqsat etti. Ras, sýret óneri óńirde úlken qoldaýdy qajet etedi. Belgili qylqalam sheberi Qudash Nursadyqovtyń uıytqy bolýymen «Jańǵyrý» sýretshiler birlestigi qurylǵan. Birlestik aıasynda birqatar sýretshi toptasyp, birneshe kórme de ótkizgen. Bul joly da kórmege atalmysh birlestiktiń músheleri qatysty.
– Jas sýretshiler osyndaı baıqaýlarǵa qatysyp júlde alyp jatsa, olar úshin úlken stımýl. Beıneleý ónerin damytý úshin, týrasyn aıtqanda, qarjylaı qoldaý kerek. Tereń túsinsek, búgingi urpaq beıneleý ónerine jaqyn bolsa, erteń olardan myqty tehnık mamandar shyǵýy múmkin, – deıdi kásibı sýretshi Erjan Turǵanbaev.
Sonymen qazylardyń sheshimimen áýesqoı sýretshiler arasynda baıqaýdyń bas júldesin Aınaz Ermuqan ıelendi. Al ekinshi oryndy Araılym Temirbekova enshiledi. Úshinshi oryn Beksultan Amanǵazynyń qanjyǵasynda.
Kásibı sýretshiler arasyndaǵy birinshi oryndy Gúlnár Bekberdınova alsa, ekinshi oryn Mádı Qaıyrhanǵa buıyrdy. Júldeli úshinshi oryndardy Erjan Turǵanbaev pen Qudash Nursadyqov qanaǵat tutty.
Aıta ketsek, birinshi orynǵa laıyq dep tabylǵan polotnoda Muhtar Áýezovtiń jas kezi beınelengen. Portret aınalasynda jazýshynyń týǵan jeri, shyǵarmashylyǵy kórinis tapqan. Erekshe stılde jazylǵan kartınanyń kompozısııasy da kórermendi birden baýrady.
Saltanatty túrde ashylǵan kórme kitaphana zalynda bir aı boıy kórermen nazaryna usynylady. Beıneleý ónerin qasıet tutsańyz, kúıbeń tirlikti ysyra turyp, kórmeni tamashalap qaıtýyńyzǵa bolady. Kitaphana esigi árqashan ashyq.
Shyǵys Qazaqstan oblysy