Qyrǵyzdyń bermet keshteri

Qyrǵyz kınosy kúnderiniń ashy­lýymen bastalǵan is-sharalar kór­meler men konsertterge, dóńgelek ústel men spektaklge ulasty. Máselen, kınokórsetilim kún­derinde «Akyrky kóch» (re­jısseri B.Muqul), «Darak yry» (rejısseri A.Daıyrbekov), «Sham­bala» (rejısseri A.Sýıýn­dýkov), «Kól» (rejısseri A.Sý­ıýndýkov) kartınalary usy­nyldy.

Sondaı-aq Mádenıet jáne sport mınıstri Dáýren Abaev Qyr­ǵyz Respýblıkasynyń Má­denıet, aqparat, sport jáne jas­tar saıasaty mınıstri Altynbek Maqsutovpen kezdesip, eki el arasyndaǵy mádenı-gýma­nı­tar­lyq yntymaqtastyq máse­le­leri, atap aıtqanda, Astanada Manas eskertkishin ornatý, «Eýrazııa» kınofestıvalin jáne kósh­pe­lilerdiń dúnıejúzilik oıyn­­daryn ótkizý máseleleri tal­­­qy­landy.

Odan bólek Ulttyq akade­mııa­lyq kitaphanada eki eldiń zııaly qaýym ókilderiniń qatysýymen «Túrki áleminiń qos alyby: Áýe­zov jáne Aıtmatov» forýmy ótti. Is-shara, eń aldymen eki el arasyndaǵy gýmanıtarlyq baılanystardy nyǵaıtýdy maqsat etti. Atap aıtqanda, taraptar eki zańǵar jazýshy Muhtar Áýezov pen Shyńǵys Aıtmatov shyǵarmashylyǵynyń mádenıet­aralyq yntymaqtastyqtaǵy rólin talqylady. Forým jumy­syna memlekettik or­gan­dardyń ókilderi, qoǵam qaırat­kerleri, Qazaqstan men Qyrǵyz Res­pýb­lıkasynyń shyǵar­ma­shylyq jáne ǵylymı zııaly qaýymy qatysty.

Al Ulttyq mýzeıde qyr­ǵyz sýretshileriniń shyǵar­ma­shy­lyǵyna qurylǵan «Bastaý» kórmesi ashyldy. Dál osy kúni Q.Qýanyshbaev atyndaǵy Mem­lekettik akademııalyq qazaq mý­zykalyq-drama teatry sahnasynda qyrǵyz óner sheberleriniń gala-konserti ótti. Atalǵan keshke Memleket basshysy Qasym-Jomart Toqaev, Qyrǵyzstan Prezıdenti Sadyr Japarov jáne Eýropalyq Keńes prezıdenti Sharl Mıshel qatysty. Pre­zıdentter Qyrǵyzstannyń Ult­tyq tarıhı murajaıynyń kolleksııasy qoıylǵan «Yqylym murasy» kórmesimen tanysty. Al sahnada «Manas» eposynan úzindi oqylyp, halyq aqyny Toqtoǵul Satylǵanovtyń sanattary (dıdaktıkalyq óleńderi) oryndaldy. Sondaı-aq halyq jazýshysy Shyńǵys Aıtmatovtyń shyǵarmalarynan úzindiler qo­ıyldy.

Sonymen qatar qazaq jáne qyrǵyz halyqtarynyń baýyr­las­tyǵyn dáripteý maqsatynda qyrǵyz ónerpazdary Shoqan Ýálıhanov, Abaı Qunanbaıuly, Jambyl Jabaev, Muhtar Áýezov sııaqty tulǵalarymyzdyń beıne­sin somdap, eki halyqqa keń tara­ǵan án-kúılerdi oryndady.

Al kelesi kúni «Manas» eposyna arnalǵan konsert jáne Nurdın Túgelov atyndaǵy «Aq maral» memlekettik bı ansambli men Chalagyz Isabaev atyndaǵy «Qambarqan» folklorlyq-etno­gra­fııalyq ansambliniń konserti usynyldy.

Qyrǵyz mádenıeti kúnderiniń salta­natty jabylýynda Toq­to­bolot Ábdimomynov atyn­­­­daǵy Qyrǵyz ulttyq aka­de­­mııa­lyq drama teatrynyń «Sa­man­­chynyn jolý» spektakli qo­ıyldy. Aıta keteıik, bul Shyńǵys Aıtmatovtyń «Qus joly» shyǵarmasynyń jelisimen qoıylǵan. Spektakldiń re­jıs­seri Marat Kozýkeev. Shyǵarmada adamzat balasynyń soǵysqa qarsylyǵy, bir taǵdyr arqyly Jer betindegi barsha áıeldiń tragedııasy, ómir úshin kúres s­ý­retteledi. Qoıylym atal­ǵan teatr repertýaryna jýyrda qosylǵan.

Saltanatty rásimge qatysqan Qazaqstannyń Mádenıet jáne sport vıse-mınıstri Nurǵısa Dáýeshov, eń aldymen qyrǵyz delegasııasyna alǵys aıtty.

«Qyrǵyzstannyń mádenıeti kúnderi delegasııasyn bastap kelgen Altynbek Maqsutov myrzaǵa alǵys bildiremin. Sonymen qatar mádenı is-sharaǵa qatysqan 300-den astam halyq ártisteri, halyq aqyn-jazýshylary, kıno maı­talmandary, ǵylym doktorlary jáne KSRO halyq ártisi Samara Toqtaqunova basta­ǵan qoǵam qaıratkerlerine zor alǵys aıtamyn. Al búgin, Qyr­ǵyz­stannyń Qazaqstandaǵy máde­nıeti kúnderiniń Toqbolot Abdýmomýnov atyndaǵy Qyrǵyz ulttyq akademııalyq drama teat­rynyń «Samanchynyn joly» qoıy­lymymen aıaqtalýynyń ózi sımvolıkalyq mánge ıe», dedi vıse-mınıstr.

Sondaı-aq ol Qyrǵyzstannyń teatr ónerimen tanysýymyz mu­nymen bitpeıtinin, qarashanyń 1-7 kúnderi aralyǵynda Almaty qalasynda ótetin Ortalyq Azııa elderiniń halyqaralyq teatr festıvali aıasynda óz jalǵasyn tabatynyn atap ótti.

Qyrǵyz Respýblıkasynyń Mádenıet, aqparat, sport jáne jas­tar saıasaty mınıstri Altynbek Maqsutov ta qazaqstandyq ta­rap­qa is-sharalardyń joǵary deńgeıde uıymdastyrylǵany úshin rızashylyǵyn bildirdi.

«Ulttar arasyndaǵy mádenı baılanystardy nyǵaıtý maq­sa­tynda jyl saıyn túrli ha­lyqaralyq is-sharalar ótkizip kelemiz. Alaıda Qazaqstandaǵy búgingi mádenıet kúnderimizdiń mańyzy erekshe. Qyrǵyz ben qazaqtyń bir týǵandaı jaqyn ekeni tarıhta dáleldengen. Eki halyqtyń óneri men mádenıeti, salt-dástúri tereńnen tamyr tartady. Qyrǵyz mádenıeti kúnderi aıasynda ótken ár taraptaǵy is-sharalar jaqsy deńgeıde uıym­da­s­tyryldy. Sol úshin alǵys aıtamyn. Aldaǵy ýaqytta eki jaqty mádenı, ádebı, sport, jas­tar salasyndaǵy baılanystar bekı túsedi degen senimdemin», dedi qyrǵyz mınıstri.

Aıta keteıik, Qyrǵyzstan mádenıeti kúnderi delegasııasyn Qyrǵyz Respýblıkasy Máde­nıet, aqparat, sport jáne jastar saıasatynyń mı­nıstri Altynbek Maqsutov basqaryp keldi. Má­denı is-sharaǵa Qyrǵyzstannan 300-den astam adam qatysty. Atap aıtsaq, halyq ártisteri, halyq aqyn-jazýshylary, kıno maıtalmandary, ǵylym doktorlary jáne KSRO halyq ártisi Samara Toqtaqunova bastaǵan qoǵam qaıratkerleri, Toqtobolot Ábdimomynov atyndaǵy Qyrǵyz ult­tyq akademııalyq drama teatry, Ábdylas Maldybaev atyn­­daǵy Qyrǵyz ulttyq aka­de­mııalyq opera jáne balet teatry, Kameralyq hor jáne kameralyq orkestr Toqtoǵul Satylǵanov atyndaǵy Qyrǵyz ulttyq fılarmonııasy, Nurdın Túgelov atyndaǵy «Aq maral» memlekettik bı ansambli, Shalaǵyz Isabaev atyndaǵy «Qambarqan» folklorlyq-etnografııalyq an­­sambli, Qaramoldo Orozov atyn­daǵy halyq aspaptar aka­de­mııalyq orkestri, Asanqan Jumahmatov atyndaǵy Memle­ket­tik akademııalyq sımfonııalyq orkestri, «Manas» ulttyq ­teatry, Qyrǵyzstan jazýshylary, sýretshileri men kınematografıster odaǵy, Qyrǵyzstan ulttyq tarıhı mýzeıi, «Aqaq» komýzısteri, dızaınerler men rejısserler bar.