7-14 qarasha kúnderi Taılandtyń Samýtprakan qalasynda sý dobynan Azııa chempıonaty ótedi. Erler arasyndaǵy saıysta Qazaqstan men jarys qojaıyndarynan bólek, Iran, Sıngapýr, Qytaı, Kýveıt, Japonııa, Gonkong, Ońtústik Koreıa jáne Japonııa quramalary kúsh synasady.
Sporttyń bul túrinde Qazaqstannyń jeńispen órilgen baı dástúri baryn jankúıerler jaqsy biledi. Ásirese bizdiń jigitter Sary qurlyqta ótetin jarystarda aldaryna jan salmaı júr. Atap aıtsaq, osy kúnge deıin jeti márte alaýy tutanǵan jazǵy Azııa oıyndarynyń altaýynda otandastarymyz altyn tuǵyrǵa kóterildi. Tek 2006 jyly Dohada uıymdastyrylǵan Azıadada Qytaı men Japonııany alǵa jiberip, úshinshi orynda qalyp qoıdy. 1995-2016 jyldar aralyǵynda jalaýy jelbiregen Azııa chempıonattarynda 4 altyn, 2 kúmis jáne 1 qolany oljalady. Odan bólek, Olımpııa oıyndarynda tórt ret baq synady. Eń úzdik kórsetkishi – 2000 jyly Sıdneı Olımpıadasynda toǵyzynshy oryndy ıelenýi. Toǵyz ret álem chempıonatynda boı kórsetti. Alaıda Eýropa men Amerıkanyń myqty komandalarynyń qarqynyna tótep berý múmkin bolmady.
Elimizdiń áıelder quramasynyń da jetistigi az emes. Olar 2010, 2014 jáne 2018 jyldary ótken Azııa oıyndarynda kúmis medal ıelendi. Birneshe ret Sary qurlyq birinshiliginde júldegerler sanatyna qosylyp, Olımpıada men álem chempıonattarynda óner kórsetti. Ǵasyrlar toǵysynda Sıdneıde alaýy tutanǵan tórt jyldyqtyń basty dodasyna altynshy oryndy enshiledi. Ázirge burymdylarymyzdyń eń úzdik nátıjesi osy. Bıyl Samýtprakanda Taıland, О́zbekstan, Qytaı, Sıngapýr, Japonııa, Ońtústik Koreıa jáne Qazaqstan vaterpolshylary saıysqa túsedi.
Erler men áıelder arasynda ótetin qos jarysta 2023 jyldyń 14-30 shildesi aralyǵynda ótetin álem chempıonatynyń joldamalary sarapqa salynady.