Kúni keshe Kásibı tennısshiler qaýymdastyǵy (ATP) men Áıelder tennıs qaýymdastyǵy (WTA) sportshylardyń reıtıngin jarııalady. Qazan aıyndaǵy nátıje boıynsha Qazaqstan erler quramasynyń ókilderi reıtıngte joǵarylap keledi.
Máselen, erler arasyndaǵy elimizdiń birinshi raketkasy Aleksandr Býblık Bazeldegi týrnırdiń shırek fınalyna jetkeni úshin 70 reıtıngte upaı jınap, 38-orynnan 36-satyǵa kóterildi. Sonymen qatar «Chelendjer» týrnırlerinde táýir óner kórsetken Tımofeı Skatov pen Beıbit Juqaev ta óz reıtıngterin jaqsartyp aldy. Qazirgi tańda Skatov 141-shi, Juqaev 321-orynda tur. О́kinishke qaraı, Mıhaıl Kýkýshkın (235), Denıs Evseev (287), Dmıtrıı Popko (324) jáne Grıgorıı Lomakın (938) ár apta saıyn reıtıngte tómendep barady.
Al áıelder arasyndaǵy reıtıngte qazaqstandyqtardan Elena Rybakına óz ornyn saqtap qalǵan bolsa, qalǵan tennısshilerimiz tómen qaraı syrǵydy. Atap aıtqanda, Gvadalaharadaǵy (Meksıka) týrnırdiń ekinshi aınalymynda súringen Rybakına 22-orynda qalsa, Iýlııa Pýtınseva bir saty tómendep, 54-orynǵa jaıǵasty. Jibek Qulambaeva (442) alǵashqy TOP-500 tennısshiniń qatarynda qalsa, Zarına Dıas TOP-1000 tennısshiniń ishinen shyǵyp qaldy. Jaraqatyna baılanysty jarty jyldan asa kortqa shyqpaǵan Dıas 1040-orynda tur.