Qazaq Ulttyq agrarlyq zertteý ýnıversıtetinde EMVA/MVA baǵdarlamasy ashyldy. Azyq-túlik ónimderin óndirý, qaıta óńdeý, agrobıznes jáne aýyl sharýashylyǵy kásipkerligi salasynda mamandar men kásipkerlerdi daıarlaýǵa baǵyttalǵan ınnovasııalyq jobanyń ashylý saltanatyna qatysqan Aýyl sharýashylyǵy mınıstrligi Ulttyq agrarlyq ǵylymı-bilim berý ortalyǵynyń basqarma tóraǵasy Darhan Balpanov ýnıversıtettiń alǵashqylardyń biri bolyp engizip otyrǵan bastamasyna qoldaý kórsetti. Ol tyń baǵyt joǵary bilim berýmen qatar, ǵylymdy damytýǵa, bıznesti jáne jalpy aýyl sharýashylyǵyn órkendetýge zor yqpal etetinine senim bildirdi.
Zamanaýı múmkindikterdi ıgergen sheteldik jáne otandyq bıznes-trenerlerdiń qatysýmen júzege asatyn ınnovasııalyq joba bıznes-bilim berý naryǵynda básekege qabilettilikti arttyrý men álemdik tájirıbelerdi qoldanýdy maqsat etedi. О́z kezeginde QazUAZÝ basqarma tóraǵasy – rektordyń mindetin atqarýshy, akademık Qanat Tireýov EMVA/MVA baǵdarlamasy Qazaqstanda, Ortalyq Azııa elderinde agrosektor mamandaryn daıarlaý jáne aýyl sharýashylyǵy ónimderin óndirýmen, eksporttaýmen jáne azyq-túlik ónimderin óńdeýmen aınalysatyn jumys berýshilermen tyǵyz baılanys ornatý baǵytyndaǵy baǵdarlama ekenin atap ótti.
Osy oraıda AQSh-tyń Almatydaǵy Bas konsýly Kerolaın Sevıdj aýyl sharýashylyǵy jaqsy damyǵan shtatta týyp-óskenin jáne azyq-túlik óndirý máselesiniń álemdik deńgeıdegi problema ekenine toqtalyp, EMVA/MVA aıasyndaǵy jańa bastama agrosektordyń damýyna, osy salada eńbek etetin bilikti, kásibı mamandar daıarlaýǵa múmkindik beretinin jetkizdi.
Professor Rafıs Abazov baǵdarlamanyń álemdik bıznes – bilim berý keńistigine ıntegrasııalanýy, aýyl sharýashylyqty óńirlerde agrobıznes jáne kásipkerlik salasyndaǵy baǵdarlamalardy damytý, iske asyrý, otandyq jáne halyqaralyq bıznes – bilim berý naryǵynda básekege qabilettilikti arttyrýdy qamtamasyz etý men zamanaýı tehnologııalaryn meńgergen kásibı basqarý kadrlaryn daıarlaýdaǵy múmkindikterine toqtaldy.
Jıyn barysynda, sonymen qatar BUU-nyń Qazaqstandaǵy aqparattyq keńsesiniń dırektory Vlastımıl Samek, Túrkııanyń Almatydaǵy Elshiliginiń vıse-konsýly Shermın Tekın, Fransııa-Qazaqstan SО́P Bas dırektory M.Artyqbekova, Medeý aýdany ákiminiń orynbasary A.Nurlybaev, «Sanaly Urpaq» respýblıkalyq jobalyq keńsesiniń basshysy Q.Tokýshev, Almaty qalalyq «Atameken» kásipkerler palatasynyń dırektory A.Qoshmambetov qatysyp, pikir bildirdi.
Mamandar baǵdarlama agrarlyq sektorda jańa úlgidegi basqarýshylardy daıarlaýǵa septigin tıgizetinin jetkizdi. Aldaǵy ýaqytta Polsha, Qytaı, Nıderland, Túrkııa jáne AQSh-tan halyqaralyq jattyqtyrýshylar men oqytýshylar shaqyrylady.
ALMATY