Bul joly «El úlesi – páterge» deıtin saýapty istiń arqasynda respýblıka boıynsha 609-baspana – Aqtóbe oblysy, Hromtaý aýdanynyń turǵyny, III toptaǵy múgedek, 4 bala baǵyp otyrǵan kópbalaly ana Sáýle Aıdarbekqyzyna buıyrdy.
Aqtóbe oblysynyń bas ımamy Serikjan Enshibaıuly men oblystyq «Nur Ǵasyr» meshitiniń naıb ımamy, QMDB «Zeket jáne qaıyrymdylyq» qorynyń Aqtóbe oblysy boıynsha ókili Almat Álı Hromtaý aýdanyna barǵan sapary barysynda tabystady. Bul týraly Aqtóbe oblystyq ortalyq «Nur Ǵasyr» meshitiniń baspasóz qyzmeti habarlady.
Aýdannyń bas ımamy Erik Sultanovtyń uıymdastyrýymen jáne meshit jamaǵaty, aýyl turǵyndary men jomart jandardyń demeýshiliginiń arqasynda syıǵa tartylǵan 1 bólmeli páterdiń quny – 3 mln 400 myń teńge.
Múmkindigi shekteýli otbasylarǵa orasan qýanysh syılap júrgen «El úlesi – páterge» jobasy aldaǵy ýaqytta Aqtóbe ókildiginiń uıytqy bolýymen osy óńirde jalǵasyn tabady.