Qazaqstannyń birinshi, álemniń 36-raketkasy Aleksandr Býblık Fransııa astanasy – Parıjde bastalǵan ATP 1000 Paris Masters týrnıriniń ekinshi aınalymyna shyǵa almady.
Qazaqstandyq sportshy alǵashqy kezeńde dúnıejúzilik reıtıngte 74-orynda turǵan shvesııalyq Mıkael Imermen sheberlik baıqasty. Býblık birinshi sette matchty breıkpen bastaǵanymen, keıinnen qatarynan alty geımde qarsylasyna jol berip, 1:6 esebimen jeńilip qaldy. Ekinshi setti jerlesimiz sátti bastaǵanymen, báseke taı-breıkke deıin sozyldy. Bul joly qarsylasyna qaraǵanda sátti oınaǵan qazaqstandyq tennısshi basym boldy – 7:6 (7:2). Al úshinshi, sheshýshi partııada shvesııalyq báribir óz degenine jetip, kelesi kezeńge joldama aldy – 6:4. Eki tennısshi buǵan deıin Devıs kýbogy aıasynda bir márte kezdesip, onda jerlesimiz úsh sette – 3:6, 6:0, 6:0 esebimen jeńiske jetken bolatyn.
Sondaı-aq búgin juptyq syndaǵy álemniń 12-raketkasy qazaqstandyq Anna Danılına WTA qorytyndy týrnırindegi alǵashqy kezdesýin ótkizedi. Brazılııalyq Beatrıs Haddad Maııamen birge juptasyp óner kórsetetin jerlesimiz alǵashqy aınalymda Gabrıela Dabrovskı (Kanada) men Djýlıana Olmos (Meksıka) jubymen oınaıdy. Atalǵan doda AQSh-tyń Fort-Ýort qalasynda 31 qazanda bastalsa, 7 qarashaǵa deıin jalǵasady.