Qazan aıynyń qorytyndysy boıynsha, teńge baǵamy 1 AQSh dollary úshin 468,23 teńgege deıin, 1,7 paıyzǵa nyǵaıdy. Ulttyq banktiń habarlaýynsha, Qazaqstan qor bırjasyndaǵy (KASE) saýda-sattyqtyń ortasha kúndik kólemi bir aıda 91 mln dollardan 121 mln dollarǵa deıin ulǵaıdy. Saýda-sattyqtyń jalpy kólemi 2,4 mlrd dollardy quraǵan.
О́tken aıda kvazımemlekettik sektor sýbektileri 528,6 mln dollar kóleminde valıýtalyq túsimdi satqan. Aıta keteıik, atalǵan sektordaǵy kompanııalar ekinshi deńgeıli bankter arqyly valıýta naryǵynda satýdy óz betinshe júzege asyrady.
«Ulttyq qordan respýblıkalyq bıýdjetke transfertterdi qamtamasyz etý úshin valıýta satý qazan aıynda 362 mln dollardy qurady. Ulttyq qordan satý úlesi jalpy saýda-sattyq kóleminiń 15 paıyzyn jáne kúnine 30 mln dollardan aspaıtyn mólsherde boldy. Ulttyq qordan valıýtany satý jónindegi operasııalardy júzege asyrý kezinde Ulttyq bank naryqtyq trendti qalyptastyrýǵa aralaspaý qaǵıdatyn ustanyp, «price-taker» qalpynda qalatynyn atap ótken jón. Osylaısha, valıýta naryǵyndaǵy qazirgi jaǵdaılardy saqtaý maqsatynda Ulttyq bank valıýtany satýǵa óz ótinimderin bermegenimen, naryqqa qatysýshylar bergen burynnan bar ótinimderdi qanaǵattandyrady. Bul tájirıbe Ulttyq qordan valıýta naryǵyna operasııalardyń tıgizetin áserin barynsha azaıtýǵa múmkindik beredi», delingen habarlamada.
Sondaı-aq qazan aıynda Ulttyq bank valıýtalyq ıntervensııalar júrgizbegen. Sonymen birge BJZQ zeınetaqy aktıvteri men senimgerlik basqarýdaǵy basqa qorlar úshin shetel valıýtasyn satyp alý nemese satý boıynsha operasııalardy da júzege asyrmaǵan.
«Qysqa merzimdi perspektıvada teńgeniń qubylmalylyǵy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtardaǵy ahýalǵa baılanysty bolady. Ulttyq bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejimin ustanýdy jalǵastyrady», dep málimdedi Ulttyq bank ókilderi.