M.S.Nárikbaev atyndaǵy Qazaq zań ýnıversıtetinde «Daryndardy basqarý – HR stýdentteriniń birinshi forýmy» ótti. Forýmǵa elimizdiń 12 ýnıversıtetinen 70-ke jýyq bolashaq HR mamandary qatysty. Atalǵan is-shara Qazaqstannyń HR qaýymdastyǵymen birlese otyryp, elimizdiń joǵary oqý oryndaryndaǵy HR stýdentterine erekshe nazar aýdarý, olarǵa berilip jatqan bilim sapasyn saralaý maqsatynda uıymdastyryldy.
Forýmǵa Prezıdent Ákimshiliginiń Memlekettik basqarý bóliminiń meńgerýshisi Áltaıyr Ahmetov, Ǵylym jáne joǵary bilim mınıstri Saıasat Nurbek, HR menedjerleri qaýymdastyǵynyń Jalpy jınalysynyń tóraǵasy Álıhan Baımenov, Eńbek jáne halyqty áleýmettik qorǵaý vıse-mınıstri Oljas Ordabaev, ýnıversıtettiń basqarma tóraǵasy Talǵat Nárikbaev jáne basqa da tanymal qoǵam qaıratkerleri, HR menedjerler men ınflıýenserler qatysty.
«Sheshimniń joly – mamanda. Djın Kollınz óziniń «Jaqsydan ulyǵa» atty eńbeginde barlyq máseleni myqty kadr sheshetinin atap ótken bolatyn. Bizdiń ýnıversıtettiń basty maqsaty – halyqqa qyzmet etý. Sol sebepti qoǵamǵa kerek tulǵalardy daıarlaımyz. О́ıtkeni árbir dıplom alǵan túlekke jaýaptymyz», dedi T.Nárikbaev.
Maman daıarlaýǵa qatysty mańyzdy máslıhatta HR-dyń joǵary oqý oryndaryndaǵy oń ózgeristerdi basqarýdaǵy róli, qazirgi HR stýdentterdiń elimizdegi korporatıvtik basqarý mádenıetin damytýdaǵy áleýeti tóńiregindegi ózekti máseleler talqylandy.
«Adamı kapıtaldyń damý deńgeıi – áleýmettiń damý ındıkatory. XXI ǵasyr – túrli bıotehnologııa, ınfokommýnıkasııa zamany. Biraq osynyń bári adam úshin, adam jasaıdy. Adamzat tehnologııalyq damý satysy joǵarylaǵan saıyn adamı kapıtal qundylyǵy da nyǵaıa túsedi. Sol sebepten ortamyzǵa kelip otyrǵan stýdentter – bolashaq HR mamandardyń sapasy mańyzdy. Forýmǵa qatysyp otyrǵan bilim alýshylarǵa 500-den astam kásibı maman kiretin HR menedjerleri qaýymdastyǵyna bir jyldyq músheligin tegin usynýdy qup kórip otyrmyz», dedi Á.Baımenov.
Barlyq oń ózgeristiń negizi – adam kapıtaly. Al sol aktıvti qundy etetin, úzdiksiz damytatyn qazaqstandyq joǵary bilim oshaqtarynda HR mamandarynyń daıyndyǵy, HR oqý baǵdarlamalary sapasy, zamanaýı úderis-talaptarǵa sáıkestigi, óndiris-áleýetti jumys berýshilermen baılanys tetikteri, ýnıversıtetterdiń okytýshy-qyzmetkerlerin kásibı damýǵa yntalandyratyn HR strategııasy óte ózekti.
«Ýnıversıtetterdiń HR komandalary oń ózgeristerdi qamtamasyz etýde mańyzdy tetik ekenin bárimiz moıyndaımyz. Oqytýshylar, ǵalymdar, ákimshilik qyzmetkerler – barlyǵy ýnıversıtet mıssııasy men strategııasyn, memlekettik saıasat turǵysynan joǵary bilim men ǵylym aldyndaǵy basty maqsattardy jetik túsinip, sapaly bilim berý úshin de HR menedjmenti yntalandyrýdyń, motıvasııalaýdyń zamanaýı erekshelikteri men úderisterinen habardar bolýy ýaqyt talaby. Myqty HR-y bar uıym qaı kezde de aldyńǵy shepte bolmaq. Osy forýmnyń qorytyndylary mindetti túrde buqaraǵa jetkizilip, mamandardyń kúndelikti jumysynda qoldanylady. Osyndaı ýaqtyly ári ózekti bastamany alǵa tartyp, HR stýdentteriniń birinshi forýmyn uıymdastyrǵan oqý ornyna alǵys aıtamyn», dedi Ǵylym jáne joǵary bilim mınıstri Saıasat Nurbek.