О́kinishke qaraı, Qaraǵandy shahtasyndaǵy apat taǵy bes kenshiniń ǵumyryn qıdy. Qarashanyń 3-ine qaraǵan túni saǵat 3.00-de bolǵan «ArselorMıttal Temirtaý» AQ-ǵa qarasty Lenın atyndaǵy shahtadaǵy náýbet orny tolmas asa aýyr qaıǵyǵa dýshar etti. Gazdrenajdyq uńǵyma burǵylaý kezinde kenetten joǵary konsentratty metan gazy bólinip, shahtadaǵy 106 adamnyń 101-i dereý evakýasııalandy. Resmı aqparattar alǵash 4 adamnyń qaza tapqanyn jarııalaǵan edi. Tańerteń saǵat 9:09 mınýtta besinshi adamnyń denesi tabylǵany habarlandy.
«Jer astyndaǵy 106 adamnyń 9-y zardap shekti. 4-eýi – aýrýhanada, 5 adam qaza tapty. Qazir apattyq-qutqarý jumystary júrgizilip jatyr. Biz qaza tapqan kenshilerdiń otbasylaryna kóńil aıtamyz. Zardap shekkenderdiń barlyǵyna tıisti kómek kórsetiledi», deıdi «ArselorMıttal Temirtaý» AQ Kómir departamentiniń dırektory Arman Qalyqov.
«KÁAQQ ROSh» JShS Qaraǵandy fılıalynyń alty qutqarýshy bólimshesi – 35 qutqarýshy 830 metr tereńdikte qutqarý jumystaryna jumyldyryldy. Qutqarýshylardyń aıtýynsha, apat aıaq astynan shyqqandyqtan kenshiler ózin-ózi qutqarý qurylǵylaryna qosyla almaı qalǵan.
– Alǵashqyda úsh adamnyń denesin taptyq. Biraz ýaqyttan keıin taǵy bireýin, sodan soń besinshi kenshini taýyp aldyq. Apat kenetten bolǵandyqtan kenshiler ózin-ózi qutqarý qurylǵylaryna qosylyp úlgermegen, – dedi «KÁAQQ ROSh» JShS Qaraǵandy fılıaly dırektorynyń orynbasary Jumat О́kenov.
Alǵashqyda apat ornynan Shahtınsk qalasynyń ortalyq aýrýhanasyna zardap shekken 4 adam jetkizildi. Onyń ekeýine metanmen ýlanǵan dıagnozy aldyn ala qoıylyp, H.Maqajanov atyndaǵy kópbeıindi aýrýhananyń toksıkologııa bólimine dereý aýystyrylǵan-dy. Dárigerler konsılıýmynan soń qalǵan eki kenshi de osy aýrýhanaǵa aldyryldy. Sebebi olarda ýlanýmen qatar bastyń ashyq jaraqaty bar.
– Eki naýqasta bastyń ashyq jaraqaty jáne ýlaný bar. Olardy operasııaǵa daıyndaýda. Bir saǵattan soń operasııa jasalady. Esterin biledi. Degenmen jaǵdaılary aýyr, reanımasııada. Jaraqattyń aýyrlyǵyn eskersek, naqty boljam jasaý qıyn, – dedi H.Maqajanov atyndaǵy kópbeıindi aýrýhana dırektorynyń emdeý isi jónindegi orynbasary Talǵat Júken. Qalǵan eki kenshiniń jaǵdaıy turaqty.
Qaraǵandy oblystyq polısııa departamentiniń baspasóz qyzmeti Lenın atyndaǵy shahtadaǵy tótenshe jaǵdaıǵa baılanysty Qazaqstan Respýblıkasy Qylmystyq Kodeksiniń 277-baby 3-tarmaǵyna sáıkes qylmystyq is qozǵalǵanyn habarlady. Oqıǵa ornynda Qaraǵandy oblystyq polısııa departamentiniń jedel-tergeý toby tergeý jumys júrgizýde.
Al Memleket basshysy Qasym-Jomart Toqaev qaza tapqan jumysshylardyń otbasylary men jaqyndaryna kóńil aıtý jedelhatyn joldady.
«ArselorMıttal Temirtaý» aksıonerlik qoǵamynyń shahtasynda bolǵan apat saldarynan qaza tapqan jumysshylardyń otbasylary men jaqyndarynyń qaıǵysyna ortaqtasyp, kóńil aıtamyn. Zardap shekken azamattardyń tezirek saýyǵyp ketýine tilektestik bildiremin. Úkimetke jáne Qaraǵandy oblysynyń ákimine apat sebepterin anyqtaý úshin shuǵyl sharalar qabyldaýdy jáne qaıtys bolǵan jáne zardap shekken azamattardyń otbasylaryna tıisti kómek kórsetýdi tapsyrdym», dep jazylǵan jedelhatta.
Apattyń sebepterin anyqtaý úshin Tótenshe jaǵdaılar mınıstri Iýrıı Ilın basqarǵan úkimettik komıssııa quryldy. Qaza bolǵan kenshiler otbasyna oblys ákimi Jeńis Qasymbek te kóńil aıtyp, kómek kórsetiletinin jetkizdi.
Qaza tapqan kenshilerdiń jasynyń aldy 42-de bolsa, eń jasy 26-da.
Lenın atyndaǵy shahtada qaza tapqandar tizimi
Boıchenko Dmıtrıı Igorevıch, 1991 jyly týǵan, jerasty burǵylaý qondyrǵysynyń mashınısi. Jumys ótili – 8 jyl. Artynda anasy qaldy. Sanjarov Andreı Pavlovıch, 1980 jyly týǵan, jerasty burǵylaý qondyrǵysynyń mashınısi. Jumys ótili – 21 jyl. Ata-anasy men eki balasy qaldy. Inkın Denıs Anatolevıch, 1984 jyly týǵan, jerasty burǵylaý qondyrǵysynyń mashınısi. Jumys ótili – 13 jyl. Marqumnyń sońynda ákesi, jubaıy, qyzy jáne asyraýyndaǵy taǵy bir adam qaldy. Qashkeı Arman Qadyrjanuly, 1993 jyly týǵan, jerasty burǵylaý qondyrǵysynyń mashınısi. Jumys ótili – 8 jyl. Artynda ata-anasy qaldy. Yntybekov Marǵulan Serikuly, 1996 jyly týǵan, burǵylaý qondyrǵysy mashınısiniń kómekshisi. Jumys ótili – eki aı. Marqumnyń artynda ákesi qaldy.Eske sala keteıik. Byltyr, dálirek aıtqanda, osy ýaqytta qarashanyń 7-inde saǵat 08.30-da Abaı shahtasyndaǵy jarylystan 6 adam qaza tapqan-dy. Munda apatqa kómir men gazdyń kenetten jarylýy sebepker bolǵan edi.
Qaraǵandy oblysy