О́tken táýlikte Aqmola, Qostanaı jáne Soltústik Qazaqstan óńirleriniń respýblıkalyq mańyzy bar kúre joldarynda jańbyr men qar jaýyp, jolshy mamandar túni boıy kóktaıǵaqty aldyn alýǵa baǵyttalǵan jumystardy atqardy, dep habarlaıdy Egemen.kz.
QazAvtoJol ulttyq kompanııasynyń baspasóz qyzmeti habarlaǵandaı, 4 qarashadan 5 qarashaǵa qaraǵan túni atalmysh óńirlerdegi respýblıkalyq mańyzy bar joldardy qardan tazartýǵa, kóktaıǵaqqa qarsy materıal sebýge, sondaı-aq patrýldeý jumystaryna 144 birlik arnaıy tehnıka men 230 adam jumyldyryldy. Kún raıy nasharlaǵan sátten bastap 1 myń m3 kóktaıǵaqqa qarsy materıal paıdalanyldy.
Qazirgi ýaqytty elimizdegi respýblıkalyq mańyzy bar joldar ashyq. Jolshy mamandar qysqy-kútip ustaý jumystaryn atqarýdy jalǵastyryp jatyr.