Almaty qalasynda Jambyl atyndaǵy Qazaq memlekettik fılarmonııasy men Qurmanǵazy atyndaǵy Qazaq ulttyq konservatorııasynyń negizinde Batyrhan Shókenov atyndaǵy qoǵamdyq qordyń, Qazaqstandaǵy Gete ınstıtýtynyń jáne Fransýz alıansynyń qoldaýymen Halyqaralyq aǵash úrmeli aspaptar akademııasy ashyldy. Mádenıet jáne sport mınıstrliginiń qoldaýymen klassıkalyq mýzyka ónerindegi biregeı jobanyń negizgi uıymdastyrýshysy – Jambyl atyndaǵy Qazaq memlekettik fılarmonııasy.
Halyqaralyq aǵash úrmeli aspaptar akademııasy muǵalimder men jetekshi solıster – Son Hıýn Cho (Ońtústik Koreıa), Tomas Hatchınson (Jańa Zelandııa, Fransııa), Roman Lıýk (Germanııa, Fransııa) jáne Djovannı Pýnsı (Italııa) usynǵan tórt kúndik praktıkalyq semınarlardan turady. Bul joba kóktemde qurylǵan Fleıta akademııasynyń jalǵasy ispetti.
Akademııaǵa Almaty, Astana jáne Qaraǵandy qalalarynan iriktelgen 40 qatysýshy konkýrstyq negizde shaqyryldy. Olar jetekshi halyqaralyq mamandardyń basshylyǵymen praktıkalyq bilimdi tegin ıgeredi. Uıymdastyrýshylar úshin jas oryndaýshylardyń, mýzykanttardyń kásibı damýyna qatysty tolǵandyrǵan suraǵyna jaýap berip, sondaı-aq qoǵamdastyq arasyndaǵy baılanysty nyǵaıtý mańyzdy. Akademııanyń sheberlik synyptary erkin tyńdaýshylar úshin ashyq bolady, bul úrdisti baqylaýǵa, bilimin jetildire túsýge jáne osy ortadaǵy áriptesterimen tanysýǵa múmkindik beredi.
«Biz úshin akademııalyq ortany damytý jumysy 2018 jyly bastaldy. Sonda seriktesterimizdiń arqasynda úrmeli aspaptarda oınaıtyn daryndy oryndaýshylar úshin ataýly shákirtaqy taǵaıyndadyq jáne úrmeli aspaptarda oınaýdy úırenetin daryndy oqýshylar men stýdentterge arnalǵan eki respýblıkalyq baıqaý ótkizdik», deıdi Batyrhan Shókenov atyndaǵy qordyń dırektory Nargız Shókenova.
Akademııa Jambyl atyndaǵy Qazaq memlekettik fılarmonııasynyń Úlken zalynda ótken saltanatty Gala-konsertpen aıaqtaldy.
Baıan MURATBEKQYZY,
Ál-Farabı atyndaǵy Qazaq ulttyq ýnıversıtetiniń stýdenti