Iordanııanyń bas shahary – Ammanda ótip jatqan bokstan erler jáne áıelder arasyndaǵy Sary qurlyq básekesi bel ortasyna jetti. Jarystyń alǵashqy aptasynan keıin úzdik boksshylar iriktelip, shırek fınal men jartylaı fınalǵa shyqqan bylǵary qolǵap sheberleri belgili bola bastady. Sol tańdaýly boksshylardyń qatarynda qazaqstandyq sportshylar da bar.
Azııa chempıonatynyń alǵashqy aptasynda Qaırat Sátjanov jattyqtyratyn Qazaqstan ulttyq quramasynyń bes ókili sharshy alańǵa kóterilip, sonyń tórteýi jarysty ári qaraı jalǵastyrýǵa múmkindik aldy. О́kinishke qaraı, 63,5 kılo salmaqta judyryqtasqan Sanatáli Tóltaev birinshilikti ekinshi kezeńnen aıaqtaýǵa májbúr boldy.
Al jarystyń tórtinshi kúninde úsh boksshymyz ekinshi aınalymdaǵy jekpe-jekterin ótkizip, barlyǵy da jankúıerlerdi jeńisimen qýantty. Atap aıtar bolsaq, byltyr 67 kılo salmaqta el chempıony atanǵan jambyldyq jampoz Dýlat Bekbaýov Azııa chempıonatyndaǵy alǵashqy kezdesýin túrikmenstandyq Saparmýrat Odaevpen ótkizip, qarsylasyn aıqyn basymdyqpen tize búktirdi – 5:0. Bıylǵy jastar arasyndaǵy Azııa birinshiliginiń kúmis júldegeri atanǵan Odaev úsh raýndta da jerlesimizge esh qarsylyq kórsete almady. Olımpıada, álem jáne Azııa birinshilikteriniń chempıondary men júldegerlerin tárbıelep shyǵarǵan tájirıbeli jattyqtyrýshy Nurlan Aqúrpekovten tálim alatyn D.Bekbaýov keshegi shırek fınaldyq saıysta qyrǵyzstandyq Jaqsylyq Talaıbekovpen kúsh synasty.
Sondaı-aq kúndizgi sessııada 71 kılo salmaq dárejesinde óner kórsetken Qazaqstan ulttyq quramasynyń kapıtany, Jambyl oblysynyń taǵy bir ókili Aslanbek Shymbergenov te artyq kúsh jumsamaı shırek fınalǵa joldama aldy. 2018 jylǵy Azııa oıyndarynyń kúmis júldegeri, Qazaqstannyń eki dúrkin chempıony degen dardaı ataǵy bar Aslanbek Sary qurlyq dodasynyń 1/8 fınalynda fılıppındik Pıanar Marjondy ekinshi raýndta esinen tandyrdy. Birinshi raýndta jerlesimiz belsendi bolǵanymen, bes tóreshiniń úsheýi ǵana jeńisti Shymbergenovke berdi. Ekinshi úsh mınýttyqta iske kirisken qazaqstandyq boksshy qarsylasyn birinshi nokdaýnǵa jiberip, keıinnen aýyr soqqysymen nokaýtqa túsirdi. Fılıppındik boksshynyń jarysty ári qaraı jalǵastyra almaıtyny belgili bolǵan soń, tóreshi jekpe-jekti toqtatyp, jeńisti otandasymyzǵa berdi. Aslanbek kelesi kezdesýin búgin úndistandyq Sachınmen ótkizedi.
Keshki sessııada Qazaqstan quramasynyń bir ókili judyryqtasyp, jarystyń tórtinshi kúnin jeńispen túıindedi. Byltyr ǵana jastar arasyndaǵy álem chempıonatynda atoı salyp, keıinnen el birinshiliginde de myqtylyǵyn dáleldegen eń jeńil salmaqtaǵy (48 kılo) Sanjar Tashkenbaı eresekter dýyna erkin aralasyp ketti. Daryndy jerlesimiz Azııa chempıonatyndaǵy birinshi kezdesýin 22 jasqa deıingiler arasyndaǵy bıylǵy Azııa chempıonatynda top jarǵan ózbekstandyq Asylbek Jalılovpen ótkizip, shırek fınalǵa shyqty. Qazaqstandyq boks jankúıerleri asyǵa kútken aıqasta qazaq boksshysynyń mereıi ústem boldy – 5:0. Birinshi raýndtan bastap jekpe-jek tizginin óz qolyna alǵan Sanjar sońǵy sekýndtarǵa deıin qarqynyn bir sátke de báseńdetken joq. Nátıjesinde, bes tóreshi de jeńisti otandasymyzǵa berdi. Bul – osy birinshiliktegi qazaq-ózbek teketiresindegi ekinshi aıqas bolatyn. Qazirshe esep – 1:1. S.Táshkenbaı keshe shırek fınalda qyrǵyzstandyq Mırlan Túrikbaıulymen judyryqtasty.
Al qazaqstandyq boksshylardan birinshi bolyp shırek fınal básekelerin bastap bergen 51 kılo salmaqtaǵy otandasymyz Sáken Bıbosynov ekinshi kezdesýin de sátti aıaqtady. Ekinshi aınalymda úndistandyq Kýmar Sparshtan 4:1 esebimen aılasyn asyrǵan Sáken ¼ fınalda malaızııalyq Kaıým Arıffındi jarys jolynan yǵystyrdy. Jyl basynda ǵana 48 kılo salmaq dárejesinde jastar arasyndaǵy Azııa chempıonatynda baq synaǵan Kaıým Arıffın araǵa 10 aı salyp eresekter dodasynda jańa salmaqta baq synaýǵa bel býǵan eken. Ázirshe jas boksshynyń joly bolar emes. Osylaısha, byltyrǵy álem chempıonatynda top jarǵan jerlesimiz Azııa birinshiliginiń jartylaı fınalyna joldama alyp, el qorjynyna kem degende qola júlde salyp otyr. Bir aıta keterligi, ol 2021 jyly Dýbaıda uıymdastyrylǵan Sary qurlyq birinshiliginde qola júldeger atanǵan bolatyn. Sáken Bıbosynovtyń bıylǵy dodadaǵy basty maqsaty – Azııa chempıony ataný.
Endi jerlesimiz fınalǵa shyǵý úshin Serbııadaǵy álem chempıonatynyń 54 kılo salmaqtaǵy jeńimpazy – japonııalyq Tomoıa Sýboımen judyryqtasady. Ol shırek fınalda taıvandyq Po Veı Týdy jeńdi. Eki boksshy arasyndaǵy jekpe-jek 10 qarashaǵa josparlanǵan.
Shámil Safıýllın jetekshilik etetin Qazaqstan áıelder quramasynyń Azııa chempıonatyndaǵy ónerine toqtalar bolsaq, ázirshe qyzdarymyzdyń da qarqyny qýantarlyq jaǵdaıda. Degenmen 12 salmaqta barǵan qazaqstandyq boksshylardyń ekeýi Azııa birinshiligin shırek fınaldan aıaqtaýǵa májbúr boldy.
Máselen, 1/4 fınalda birinshi kezdesýin ótkizgen 63 kıloǵa deıin salmaqtaǵy jerlesimiz Aıda Ábikeeva japonııalyq Kıto Maıden tóreshilerdiń aralas sheshimimen jeńilse, 2016 jylǵy álem chempıony, 2017 jylǵy Azııa chempıonatynyń kúmis júldegeri Valentına Halzova Tokıo Olımpıadasynyń qola júldegeri úndistandyq Lovlına Borgohaınnen aılasyn asyra almady. 75 kılo salmaqta ótken jekpe-jekte de jerlesimiz tóreshilerdiń aralas sheshimimen utylyp qaldy.
Degenmen ózge boksshylarymyz jankúıerlerin jarqyn jeńisterimen qýanta aldy. Atap aıtqanda, eki dúrkin álem chempıony, byltyrǵy Azııa birinshiliginiń jeńimpazy Nazym Qyzaıbaı alǵashqy jekpe-jeginde taılandtyq Chýthamat Raksatpen kezdesip, bir upaı basymdyǵymen jeńiske jetti. Jerlesimiz keshegi shırek fınal básekesinde mońǵolııalyq Mýngýnsaran Balsanmen kúsh synasty.
Sondaı-aq qyzdar arasyndaǵy shırek fınaldyq jekpe-jekterde sharshy alańǵa kóterilgen Jazıra Oraqbaeva (52 kılo) Koreıa ókili Kım Chae Vondy tóreshiler sheshimimen qapy qaldyrsa, qyzdar arasyndaǵy eń oljaly boksshymyz Jaına Shekerbekova (54 kılo) japonııalyq Han Narıtýdy 5:0 esebimen tize búktirdi. 57 kılodaǵy Karına Ibragımova da tóreshilerdiń biraýyz sheshimimen taǵy bir koreıalyq Im Ae Djınnen basym tústi. Al Rıo Olımpıadasynyń qola júldegeri Darıǵa Shákimova (70 kılo) úndistandyq Pýdjeıdi bet qaratpaı utty – 5:0.
Bokstan erler jáne áıelder arasyndaǵy Azııa birinshiligi 12 qarashada máresine jetedi.