AQSh-tyń Mınneapolıs qalasynda ótken kásipqoı boks keshin kúlli Alash jurty taǵatsyzdana kútti. О́ıtkeni WBA nusqasy boıynsha sýper orta salmaqta óner kórsetip júrgen Aıdos Erbosynuly keshegi jekpe-jegin jeńispen aıaqtaǵan jaǵdaıda qazaqtyń taǵy bir bylǵary qolǵap sheberi álem chempıony atanatyn edi. О́kinishke qaraı, aıtýly boksshyǵa ondaı baq buıyrmady.
2015 jyldan beri kásipqoılar arasynda kúsh synasyp júrgen 30 jastaǵy qandasymyz sol kezden beri 16 kezdesý ótkizip, barlyǵynda jeńiske jetti. 11 kezdesýdi merziminen buryn aıaqtady. Osy tabystarynyń arqasynda Aıdos álem chempıony ataǵy úshin talasý múmkindigine ıe boldy. Qarsylasy odan alty jas kishi. Desek te maıtalman mamandardyń tarapynan Devıd Morreldiń áleýeti óte joǵary baǵalanýda. Kýbada týyp-ósip, keıinnen AQSh-qa qonys aýdarǵan ol óziniń myqtylyǵyn birden moıyndatty. Kásipqoı rıngte nebári jeti jekpe-jek ótkizgenine qaramastan, Devıd álem chempıony atanyp qana qoımaı, ózine tıesili altyn belbeýin úsh márte sátti qorǵady.
Mınneapolıstegi básekede Morreldiń basymdyǵy birden baıqaldy. Kýbalyq qabylan óziniń boıy men qolynyń uzyndyǵyn utymdy paıdalandy. Qandasymyzǵa qaraǵanda áldeqaıda jyldam ári ábjil qımyldaǵan ol únemi onyń aldyn orap otyrdy. Soqqylaryn jıi darytyp, dál tıgize bildi. Shyny kerek, alǵashynda biz Erbosynuly «bul ekpinge shydamaıtyn shyǵar» dep oıladyq. О́ıtkeni bastapqy raýndtardyń ózinde Devıdtiń birneshe soqqysy oǵan ońbaı tıdi. Sol keshte aýyr apperkottar men joıqyn hýktardyń san túrin kórdik. Keıbiri tipten Aıdosty eseńgiretip tastaǵandaı kórindi. Onyń ústine, jerlesimizdiń keńsiriginen ketken qandy toqtatý da ońaı bolmady.
Biraq Aıdos er eken. Qanshama aýyr soqqy alsa da, bárine shydap baqty. Beti qanǵa boıalyp, kózi kórýden qalsa da, sońyna deıin aıqasty. Qarsylasyn aıqyn jeńe almaıtynyna kózi jetken Morrel 12 raýnda bastalǵan bette aılaǵa júgindi. Ańǵal Aıdos abaısyzda jasalǵan belden tómen soqqysy úshin keshirim surap turǵan sátte Devıd ony uryp qulatty. Tóreshi nokdaýn belgiledi. Bul jerde biz Bostandyq araly ókilin kinálaýdan aýlaqpyz. Barlyq kiná – Aıdostyń ózinde. Boksshy qandaı kezde de bárine daıyn jáne saq bolýy kerek. Bul – bokstyń zańdylyǵy! Dál osy soqqydan keıin Erbosynuly óz-ózine kele almady. Básekeniń aıaqtalýyna sanaýly ǵana sekýndtar qalǵanda Devıd Morrel qazaq boksshysyn oń qolymen ońdyrmaı uryp, aýyr nokaýtqa jiberdi.
Dál osy jarystyń anderkardynda Abylaıhan Júsipov te kúsh synasty. Áýesqoılar arasynda álem chempıonatynda úsh ret qola medaldy ıelengen qandasymyz kásipqoı rıngtegi úshinshi kezdesýinde jeńiske jetti. Bul joly ol amerıkalyq Demarkýs Leıtondy (8-3-1, 5 KO) ekinshi raýndta esinen tandyrdy.