О́tken aptada «Senimen Bolashaq» respýblıkalyq ata-analardyń qoǵamdyq birlestiginiń bastamasy boıynsha «Ult muraty jolynda: tárbıe, bilim, ǵylym jáne iskerlik» taqyrybynda ult zııalylarynyń respýblıkalyq birinshi ǵylymı-praktıkalyq sımpozıýmy uıymdastyryldy.
Basqosýǵa jınalǵandar aldynda sóz sóılegen osy qoǵamdyq birlestiktiń quryltaıshysy, qoǵam qaıratkeri, mesenat Nurken Asanov jahandaný zamanyndaǵy otbasy qundylyqtaryn áńgimeledi.
«Bizdiń qoǵamdyq birlestiktiń eń basty mindeti ádildik, týralyq, talapshyldyq pen jandaný jáne ádepti órkenıet syndy bes qundylyqty dáripteý. Sondyqtan uıym músheleri kezekti márte bastamashyldyq tanytqan bul alǵashqy sımpozıým – elimizdegi tárbıe, ǵylym, bilim berý men iskerlik sala mamandaryn ult muraty jolynda ortaq maqsat pen murat turǵysynda jumyldyrý arqyly tıimdi sheshimder tabýdy kózdeıdi. Aldyńǵy júzdesýdiń aıasynda táýelsiz memleketimizdiń tuǵyryn bekitý baǵytynda qajyrly qyzmetimen elge tanylǵan zııaly qaýym ókilderiniń talqysyna osy taqyrypty usynǵan edik. Bul baǵaly bastama janashyr qaýymnyń tarapynan shynaıy qoldaý tapqan bolatyn. Sodan bergi ýaqyt aralyǵynda akademııalyq orta men ádisteme mamandary jáne isker azamattar osy oıdy tereń zerdelep, jan-jaqty taldaý jasaýdy jalǵastyrýda. Sondyqtan endigi kún tártibinde turǵan mańyzdy másele naqty sheshim qabyldaýdy uzaqqa sozbaı paıymdy pikirlerdiń máıegin jınaqtap, strategııalyq tujyrymdama jasaýǵa jumylý qajet», dedi Nurken Jarylqapuly.
«Ahmet Baıtursynulynyń aldyna shákirtteri jınalyp barǵan kezinde «molda bolyńdar» degen bata bergen eken. Burynǵy kezde dindarlar aǵartýshylyq qyzmetti atqarǵany tarıhtan barshamyzǵa belgili. Iаǵnı alashtyń arysy keıingi býyn ókilderine jurttyń kózin ashý arqyly, elge ıe bolýdy amanattaǵany daýsyz. Qazirgi kezde de otandyq pedagogıka salasynyń mamandaryna jańa zaman talabyna saı básekege qabiletti tulǵa qalyptastyrý úshin sapaly bilimmen qosa sanaly tárbıe berýdiń jaýapkershiligi júktelgen», dedi alash arystarynyń ult muraty jolyndaǵy qaıratkerlik qyzmetine toqtalǵan «Egemen Qazaqstan» RG» JShS Bas dırektory, fılologııa ǵylymdarynyń doktory, professor, ádebıet tarıhshysy, alashtanýshy ǵalym, QR UǴA akademıgi Dıhan Qamzabekuly.
«Osy qoǵamdyq birlestiktiń qarjylandyrýymen taǵy da birneshe qundy shyǵarmalar qaıta basyp shyǵarylýda. Solardyń biri sanatyndaǵy «Tárbıege jetekshi» atalatyn kitaptyń qundylyǵy joǵary. Eger árbir adam kemel bolam dese, osy eńbekti oqýy kerek. Búgingi jastardy kitap oqýǵa yntalandyrý aǵa býyn ókilderiniń aldynda turǵan jaýapty mindet. «Kitap men úshin patshanyń taǵynan da qymbat» degendi uly kompozıtor Shekspır kezinde bekerge aıtpasa kerek», dedi «Alash jáne ulttyq ǵylymı termınologııa» taqyrybynda sóz sóılegen fılologııa ǵylymdarynyń doktory, professor, Qazaqstannyń eńbek sińirgen qaıratkeri Serik Negımov.
«Alys-jaqyn shet elderde daıyndalǵan mýltfılmder teleekranǵa shyǵyp, ınternet arqyly keńinen taraǵan boıda erteńine sol balalarǵa arnalǵan anımasııalyq ónimderdiń keıipkerleri dúkender men bazarlarda jedel satyla bastaıdy. Bizde de memlekettik tilimizde shyqqan jaqsy dúnıeler bar. Biraq olardyń balalardy qyzyqtyratyn qurastyrmaly kıiz úı men besik, halyq aýyz ádebıetindegi batyr babalarymyz ben sheshen bılerimizdi beıneleıtin ulttyq oıynshyqtardyń jıyntyǵy joq. Sondyqtan osy baǵyttaǵy jurtshylyqtyń joǵary suranysyn da eskerý arqyly qazaqy keıipkerlerdi jasaıtyn sheberlerdiń jańashyl jobalaryna qarjylyq qoldaý men kómek kórsetkenimiz durys», dedi ult rýhyn qaıta jańǵyrtý jaıynda salıqaly sóz sóılegen qoǵam qaıratkeri Orazgúl Asanǵazyqyzy.
«Bıyl alash ardaqtysy Ahmet Baıtursynulynyń týǵanyna - 150 jyl. Keńestik kezeńde esimin atap, eńbekterin oqýǵa tıym salynǵan tarıhı tulǵa alash arystarynyń rýhanı kósemi deńgeıine kóterilgen qoǵam qaıratkeri bolatyn. Sebebi ol eń aldymen patshalyq bılik pen kommýnıstik júıeniń otarshyldyq saıasatyna qarsy shyǵyp, qazaq jurtyn derbes el retinde jan-jaqty damytýdyń basym baǵyttaryn usyndy. Memlekettiń táýelsizdigin ańsaǵan azamattar eń basty ıdeologııa retinde jastardyń bastaýysh mektepten bastap qazaq tilinde bilim alyp, ulttyq rýhta tárbıelenýin basty nazarda ustady», dedi «Alash oqýlyqtarynyń zamanaýı dıskýrsy» taqyrybynda baıandama jasaǵan qazaqtyń ádebıet taný ǵylymy boıynsha kóptegen zertteý eńbekterdiń avtory, fılologııa ǵylymdarynyń doktory, Nazarbaev ýnıversıtetiniń professory Aıgúl Ismaqova.
L.N.Gýmılev atyndaǵy Eýrazııalyq ulttyq ýnıversıtetiniń professory, aqyn Ońaıgúl Turjan óskeleń urpaqty izgilik jolmen qalaı tárbıeleýdiń máni men mańyzyna toqtalsa, «Álıhan Bókeıhan - qazaq jeriniń joqtaýshysy» taqyrybynda sóz sóılegen «Alash» mádenıet jáne rýhanı damý ınstıtýtynyń dırektory Sultan Han Aqqululy jurtshylyqtiń kóbi bile bermeıtin tyń tarıhı derekterdi ortaǵa saldy. Abaıtanýshy ǵalym Omar Jáleluly paıdaly bilim konsepsııasy týraly sóz qozǵasa, professor Álıma Qısymqyzy oqý-tárbıe úderisindegi úshtik (ata-ana, oqýshy jáne muǵalim) odaqqqa negizdelgen zertteýin jınalǵandardyń nazaryna usyndy.
Júzdesý barysynda «Senimen Bolashaq» respýblıkalyq ata-analardyń qoǵamdyq birlestigi tarapynan «Asyl mura» serııasy boıynsha myń danamen basylyp shyǵyp, oqyrman qaýymǵa jol tartqan qazaqtyń kórnekti jazýshysy Júsipbek Aımaýytovtyń «Psıhologııa» men «Tárbıege jetekshisi» oqýlyqtarynyń tusaýkeser rásimi jasaldy. Qaıta jaryq kórgen bul qundy eńbekter qatysýshylardyń bárine tegin taratyldy.
«Senimen Bolashaq» respýblıkalyq qoǵamdyq birlestigi buǵan deıin de ujym janynan qurylǵan «Asyl mura» serııasynyń negizinde alash arystarynyń sonaý bir kezeńde az tırajben taralǵan tańdamaly týyndylaryn jańa formatta qaıta basyp shyǵarý arqyly el aımaǵyndaǵy kitaphanalarǵa tegin úlestirgen bolatyn. Mańyzdy basqosýǵa shaqyrylǵan ǵalymdar men zııalylar, mektep muǵalimderi qazaq ádebıetiniń negizin qalaýshylardyń biri Júsipbek Aımaýytovtyń «Tárbıege jetekshisi» men «Psıhologııa» atalatyn eńbekteriniń búgingi kúnge deıin ózektiligin joımaǵan, qazirgi qoǵamǵa qajetti kitaptar ekendigine toqtaldy.
Nurlan MERALY