Tarazda erkin kúresten kórnekti memleket jáne qoǵam qaıratkeri Dinmuhamed Qonaevty 110 jyldyq mereıtoıyna arnalǵan halyqaralyq týrnır óz máresine jetti. Birikken kúres áleminiń (UWW) baǵdarlamasyna engen jarystyń bıylǵy júlde qory 70 000 AQSh dollaryn qurady. Eń qýanyshtysy, Áýlıeata topyraǵynda Qazaqstannyń balýandary tabysty óner kórsetip, 5 altyn, 6 kúmis jáne 13 qola medal jeńip aldy. Barlyǵy – 24 júlde!
Kópshilik taǵatsyzdana kútken básekeler 125 kılo salmaq dárejesinde ótti. Fınalda elimizdiń eki birdeı beldi balýany ózara kúsh synasty. Olar – aqtóbelik Iýsýp Batyrmurzaev pen tarazdyq Álisher Erǵalı. Buǵan deıin ekeýi de 23 jastaǵylar arasynda ótken álem birinshilikterinde júldegerler sanatynan kórinip, jasóspirimder men jastar býyny arasyndaǵy jarystarda oza shapty. Odan bólek, 26 jastaǵy Iýsýp Tokıo Olımpıadasyna qatysyp, Azııa chempıony atandy. 23 jastaǵy Álisher qurlyqtyń basty dodasynda eki ret fınalda kúresse, eki ret qolaǵa qol sozdy. Sońǵy kezderi ekeýiniń joly birneshe márte qıysyp, barlyǵynda Erǵalı jeńiske jetken edi. Bul joly da dál solaı boldy. Tarazdaǵy týrnırde jergilikti sportshy Batyrmurzaevtan 7:1 esebimen basym tústi.
74 kılo salmaqta Nurqoja Qaıpanovtyń teńdessiz ónerine tamsandyq. Álem chempıonatynyń qola júldegeri, eki dúrkin Azııa chempıony degen ataǵy bar qandasymyz fınalda Majarstannyń atynan synǵa túsken daǵystandyq Mýrad Kýramagomedovti qapy qaldyrdy. 86 kılo salmaqtaǵy Azamat Dáýletbekov bul joly da óz jankúıerlerin qýantty. Osydan birer aı buryn ǵana ol Belgradta ótken álem chempıonatynda qazaqstandyq erkin kúres sheberleri arasynan jalǵyz ózi júlde alǵan edi. Semeı óńiriniń týmasy osy jarysta aldyna jan salmady. Azamat aqtyq aıqasta óziniń komandalyq áriptesi Bekzat Jumanálıdi jeńdi. Sol sekildi Meırambek Qartbaı (57 kılo) men Dáýlet Ergesh (79 kılo) te qarsylas shydatpaı, bas júldeni qanjyǵasyna baılady.
Al ózge salmaq dárejelerinde myna balýandar jeńimpaz atandy: 61 kılo – Taıyrbek Jumashbek (Qyrǵyzstan), 65 kılo – Týmýr Ochır-Týlga (Mońǵolııa), 70 kılo – Ernazar Aqmatalıev (Qyrǵyzstan), 92 kılo – Magomed Sharıpov (Bahreın) jáne 97 kılo – Ahmed Tajýdınov (Bahreın).