Statıstıkalyq málimetke súıensek, qazir Atyraý oblysynda 668 090 adam turady. Onyń ishinde 18-35 jas aralyǵynda 111 776 (17%) adam bar. Jastar arasynda baspanaǵa muqtaj jandar jetkilikti. Sol sebepti oblys ákimdigi men «Otbasy bank» AQ «Atyraý jastary» turǵyn úı baǵdarlamasyn iske qosýǵa qadam jasady.
Birlesken baǵdarlama 35 jasqa deıingi jastarǵa arnalyp otyr. Maqsat – jastardyń barynsha tıimdi sharttarmen baspana satyp alýyna jol ashý. Bul baǵdarlamaǵa dárigerler, muǵalimder, mádenıet jáne sport salasynyń ókilderi, joǵary oqý oryndarynyń professorlary, ǵylymı-zertteý ınstıtýttarynyń ǵylymı qyzmetkerleri, jýrnalıster, áleýmettik sala men kommýnaldyq kásiporynda jumys isteıtinder, sondaı-aq jetim balalar sanatymen turǵyn úı kezeginde turǵan azamattar qatysa alady. Baǵdarlamany iske asyrý jónindegi ekijaqty kelisimge Atyraý qalasynyń ákimi Meıirim Qalaýı men «Otbasy bank» AQ Atyraý oblystyq fılıalynyń dırektory Nurbol Qurman qol qoıdy.
– Bizdiń banktiń basty ustanymy – qazaqstandyqtardy jaıly baspanamen qamtamasyz etý. Jańadan iske qosylatyn «Atyraý jastary» baǵdarlamasy tabysy joǵary emes jastardyń baspana máselesin oń sheshýge baǵyttalyp otyr. О́ıtkeni jastar da páter alý úshin «Otbasy» banktegi shottaryna qarajat jınap júrgenin bilemiz. Alaıda turǵyn úı satyp alýǵa barlyǵynyń birdeı múmkindigi jete bermeıdi. Al jańa baǵdarlama iske qosylǵan soń jastardyń bul armany jaqyn arada júzege asa bastaıdy. Bul jobaǵa oblys ákimdigi 1 mlrd teńge bólse, «Otbasy bank» AQ 600 mln teńge salady, – deıdi atalǵan banktiń Atyraý oblystyq fılıalynyń dırektory Nurbol Qurman.
Onyń aıtýynsha, Atyraý oblysy – jastardy turǵyn úımen qamtamasyz etý baǵdarlamasy qolǵa alynǵan jetinshi óńir. Buǵan deıin mundaı joba Almaty men Astana qalasynda, Qaraǵandy, Taraz, Qostanaı jáne Almaty oblystarynda júzege asyrylǵan. Qazir oblys ákimdikteri men «Otbasy bank» AQ-nyń jastardyń nesıe alýyna jumsaǵan ortaq bıýdjetiniń kólemi 60 mlrd teńgeden asqan. Al «Atyraý jastary» baǵdarlamasyna qatysatyn áleýetti nesıe alýshylardyń tizimin jergilikti ákimdik usynady. Ákimdik baǵdarlamaǵa qatysý úshin ótinishti qabyldaý jáne baıqaý kezeńin daıyndap jatyr.
– Baǵdarlamaǵa qatysýshylar pýly qurylady. Sodan soń qatysýshylarǵa «Otbasy bank» arqyly turǵyn úı zaemin alýǵa joldama usynylady. Úmitkerler ózderiniń tólem qabiletin rastaǵannan keıin jyldyq 5 paıyzben zaım alady. Munda alǵashqy jarna 10% ǵana bolady. Baǵdarlama qatysýshylaryna beriletin nesıeniń eń kóp somasy – 18 mln teńge. Bul qarjy Atyraý qalasynan úı satyp alýshylarǵa beriledi. Al oblys aýmaǵynan baspana satyp alý úshin 13 mln teńgege deıin nesıe berý kózdelip otyr. Nesıe merzimi – 25 jyl, – deıdi N.Qurman.
Atalǵan banktiń oblystyq fılıaly 2006 jyly ashylǵan. Onda 34 maman jumys isteıdi. Fılıalda 7 keńes berý ortalyǵy men 82 keńesshi bar. Bıyl depozıt ashqan atyraýlyqtardyń sany 85 837-ge jetken. Olardyń depozıttegi qarjysy 70 mlrd 799 mln 807 myń teńgeni quraıdy.
«Atyraý jastary» baǵdarlamasynyń qatysýshylaryna qoıylatyn birneshe talap bar. Birinshiden, ótinim bergen kezde qatysýshynyń jasy 35-ten aspaýy kerek. Ekinshiden, qatysýshynyń Atyraý oblysynda nemese Atyraý qalasynda keminde sońǵy bir jyl turaqty tirkeýi jáne ótinish bergen kezde ózimen birge turatyn otbasy músheleriniń Atyraý oblysynda tirkeýi bolýǵa tıis. Úshinshiden, baǵdarlamaǵa qatysýshynyń jáne onyń otbasy músheleriniń sońǵy 5 jyl ishinde Qazaqstan aýmaǵynda satyp alý quqyǵymen jalǵa beriletin nemese menshik quqyǵyndaǵy turǵyn úıiniń joqtyǵy eskeriledi. Tórtinshiden, Atyraý qalasynda nemese Atyraý oblysynda tańdaǵan mamandyǵy boıynsha resmı jumys ótili bolǵany jón. Besinshiden, baǵdarlamaǵa erli-zaıypty jastardyń bireýi ǵana qatysa alady.
Atyraý oblysy