Memleket basshysy Qasym-Jomart Toqaev Atyraý oblysyndaǵy balyq sharýashylyǵyn damytýdy tapsyrdy, dep habarlaıdy Egemen.kz.
«Oblystaǵy balyq sharýashylyǵyn damytý qajet. Bul – osy aımaqtyń ekonomıkasynda mańyzdy ról atqaratyn sala. Kaspıı teńizi men Jaıyq ózeninde balyqtyń túr-túri bar. Jyl basynan beri munda 12 myń tonna balyq aýlandy. Ony óńdeý jáne daıyn ónim shyǵarý isi damyp jatyr. Degenmen, balyq sharýashylyǵyn odan ári órkendetý úshin birqatar júıeli shara qabyldaý qajet. Eń aldymen, bekire tuqymdas balyqtyń sanyn kóbeıtýge basa mán bergen jón. Álemdik naryqta oǵan suranys óte joǵary», dedi Memleket basshysy.
Bıyl Jaıyqqa 8,5 mıllıon shabaq jiberildi. Prezıdent bul jumysty áli de jalǵastyrýdy tapsyrdy.
«Memleket qaramaǵynda bekire ósiretin eki zaýyt bar. Osy kásiporyndardyń tozyǵy jetip, qural-jabdyǵy ábden eskirgen. Zaýyttardy zaman talabyna saı qaıta jańǵyrtý kerek. Sondaı-aq shabaq ósiretin joǵary tehnologııaly jańa zaýyttar salý úshin ınvestısııa tartý asa mańyzdy», dedi Q. Toqaev.