Memleket basshysy Atyraý oblysynyń jurtshylyǵymen kezdesý barysynda apatty jaǵdaıda turǵan jáne úsh aýysymmen oqytatyn mektepterdiń máselesine, sondaı-aq balabaqshalardyń jetispeýshiligine toqtalyp ótti, dep habarlaıdy Egemen.kz.
«Bilim berý jáne mádenıet salasyn damytý qajet. Oblysta apatty jaǵdaıda turǵan jáne úsh aýysymmen oqytatyn mektepter máselesi áli sheshimin tappaı otyr. Balabaqshalar da jetispeıdi. Qazir 17 myńǵa jýyq bala kezekte tur. Bul máseleni sheshýge qajetti qarjy qarastyrylǵan», dedi Prezıdent.
Memleket basshysynyń aıtýynsha, kelesi jyly «Jaıly mektep» ulttyq jobasymen 11 mektep salynady. Buǵan respýblıkalyq bıýdjetten qarjy bólinedi. Bilim berý ınfraqurylymyn jańǵyrtýǵa qatysty jospardy tolyq oryndaý kerek. Úkimet jáne ákimdik onyń ýaqtyly jáne sapaly júzege asyrylýyn qatań baqylaýǵa tıis.
«Atyraý oblysynda kásiptik jáne tehnıkalyq bilim beretin 24 mekeme bar. Onda 16 myń stýdent bilim alyp jatyr. Biraq, osy kolledjderdiń túlekteri kóbine jumys taba almaı qınalady. Bul másele ár oblysta bar. Oqý-aǵartý mınıstrligine oblys ákimderimen birlesip, kásiptik-tehnıkalyq oqý oryndaryn eńbek naryǵyna beıimdeý úshin naqty shara qabyldaýdy tapsyramyn», dedi Q.Toqaev.
Sondaı-aq Prezıdent joǵary bilimniń qoljetimdi bolýy, bilim sapasyn arttyrý, jaratylystaný jáne tehnıkalyq baǵyttaǵy ýnıversıtetterdi damytýdyń mańyzdylyǵyna toqtalyp ótti.
«Men qyrkúıektegi óz Joldaýymda osyǵan qatysty birqatar mindet júktedim. Meniń bastamammen Atyraýda Reseıdiń Gýbkın atyndaǵy munaı-gaz ýnıversıtetiniń fılıaly ashyldy. Atalǵan ýnıversıtettiń túlekterine eńbek naryǵynda suranys kóp bolady dep senemin. Meniń tapsyrmammen Qazaqstannyń irgeli joǵary oqý oryndarynda bilim alý úshin batys aımaǵyndaǵy jastaryna 10 myń grant bólindi. Biraq, osy granttarmen oqýǵa túsken bala kóp emes. Men bul týraly keshe Aqtaýda da aıttym. Atyraý oblysyna bólingen 4 myń granttyń 800-ge jýyǵy ǵana ıgerilgen. Bul – óte tómen kórsetkish. Ákimdik quzyrly mınıstrliktermen birlesip, osy másele boıynsha aqparattyq túsindirý jumystaryn júrgizýi qajet», dep atap ótti Memleket basshysy.
Q.Toqaev Atyraý qalasynda daryndy jastar úshin mádenıet jáne shyǵarmashylyq ortalyǵyn salýdy tapsyrdy.
«Oblystaǵy mádenıet salasyn damytýǵa erekshe nazar aýdarý qajet. Qalada mádenıet oryndarynyń kóbirek bolǵany jón. Men Atyraý qalasynda daryndy jastar úshin mádenıet jáne shyǵarmashylyq ortalyǵyn salýdy tapsyramyn. Ony qazaq kúı óneriniń alyby –Qurmanǵazynyń atymen ataýdy usynamyn», dedi el Prezıdenti.
Sonymen qatar ol oblys ortalyǵynda otbasylyq demalys oryndary jáne jastardyń bos ýaqytyn paıdaly ótkizetin ortalyqtardyń az ekenin aıtty.
«Oblys ortalyǵynda otbasylyq demalys oryndary jáne jastardyń bos ýaqytyn paıdaly ótkizetin ortalyqtar kóp emes. Jaıyq jaǵalaýy abattandyryldy, «Jastar saıabaǵy» salyndy. Bul oryn jergilikti jurt jıi baratyn demalys oryndarynyń birine aınaldy. Ákimdik osyndaı jańa jobalardy qolǵa alýy qajet. Qaladaǵy barlyq nysandar múmkindigi shekteýli azamattarǵa yńǵaıly bolýy kerek. Bizdiń qoǵam úshin eń mańyzdy talaptyń biri – osy.
Atyraý árbir turǵynǵa qolaıly, taza, zamanaýı qalaǵa aınalýǵa tıis. Qalada keıbir nysandardyń qurylysy kóp jyldan beri toqtap tur. Mysaly, 10 jyl buryn salyna bastaǵan Konsert zaly áli paıdalanýǵa berilgen joq. Tipti, onyń ǵımaraty jaramsyz kúıge tústi. Úkimet ákimdikpen birlesip, osyndaı nysandardy salyp bitirý máselesin birjola sheshýge tıis. Qajet bolsa, ınvestorlardy tartyńyzdar. Halyq mundaı ǵımarattardyń ıgiligin kórýi qajet», dedi Memleket basshysy Atyraý jurtshylyǵymen kezdesý barysynda.