Qymbatshylyq búıirden qysyp tur, ásirese azyq-túlik baǵasynyń ósýi azamattarǵa aýyr tıip jatyr. Bul oraıda memlekettiń áleýmettik mańyzy bar azyq-túlik (ÁMAT) ónimderiniń baǵasyn ustap turýǵa kúsh salyp jatqany belgili. Alaıda Saýda jáne ıntegrasııa mınıstrliginiń habarlaýynsha, memleket ÁMAT baǵasyn turaqtandyrýdyń «qatań» quraldaryn paıdalanýdan bas tartady.
Vedomstvonyń habarlaýynsha, azyq-túlik taýarlarynyń tapshylyǵyn boldyrmaý, otandyq bıznes pen halyq múddeleriniń teńgerimin saqtaý maqsatynda «qatań» quraldardy paıdalaný jaǵdaıdy sheshpeıdi. Iаǵnı osy kezge deıin durys dep eseptelgen – bólshek baǵalardyń shekti mánin belgilep qoıý jáne ÁMAT-qa shekti ruqsat etilgen bólshek baǵalardyń mólsherin belgileýdiń qoldanystaǵy erejeleri endigi kezekte jaramsyz. Jaramsyz bolatyn sebebi, bul tásil bıznes tarapynan renish týǵyzýda.
Osyny eskere otyryp, mınıstrlik jańa erejeler jobasyn ázirledi. Bul qujat áleýmettik mańyzy bar azyq-túlik taýarlaryn óndirýshilerdiń ózindik quny men ótkizý baǵalaryn, logıstıkaǵa arnalǵan shyǵyndardy, kóterme jáne bólshek satýshylardyń 15%-dan aspaıtyn mólsherdegi saýda ústemelerin, saqtaýǵa arnalǵan shyǵyndardy, sondaı-aq óndirýshiler men ishki saýda sýbektileriniń zalaldy qyzmetine jol bermeýdi eskeretin ÁMAT-qa bólshek saýda baǵalarynyń shekti mánderiniń mólsherin belgileý úshin jergilikti atqarýshy organdardyń esep aıyrysý túrlerin aıqyndaıdy.
«Jalpy, memleket aýyl sharýashylyǵy ónimderin óndirýshilerdi óz ónimderiniń baǵasyn óz betinshe turaqtandyrýǵa yntalandyrýǵa múmkindik beretin «ońtaıly» retteýge birtindep kóshýge nıetti. Bul – aýylsharýashylyq ónimderin óndirýshilerdi «aınalym shemalary» boıynsha tikeleı óndirýshilerge qarjylandyrý tásilderin ózgertý, aýylsharýashylyq jármeńkelerin ótkizý, qyzmet tizbegin taldaý jáne azyq-túlik baǵasyna tikeleı áser etetin aımaqtyq komıssııalardyń jumysy aıasynda ónimsiz deldaldardy anyqtaý sııaqty ádister. Budan basqa, qazirgi ýaqytta Aýyl sharýashylyǵy mınıstrligi baǵany turaqtandyrý tetigi retinde «forvard» uǵymyn engizýdi kózdeıtin ÁMAT baǵasyn turaqtandyrý tetikteriniń úlgilik qaǵıdalaryna túzetýler ázirledi», delingen mınıstrlik habarlamasynda.
Atalǵan bastamalar aýyl sharýashylyǵy taýaryn óndirýshilerdi áleýmettik mańyzy bar taýarlardy óndirýge, olardy keıinnen belgilengen baǵamen jetkizýge aldyn ala qarjylandyrýǵa múmkindik beredi.
Ulttyq statıstıka bıýrosy usynǵan derekke qarasaq, qazan aıynda jyldyq ınflıasııa 18,8 paıyzǵa jetti. Qyrkúıekpen salystyrǵanda ınflıasııa 1,6 paıyzǵa kóterilgen. Osy qarqynmen jyl sońyna deıin ınflıasııa 20 paıyzdyq mejeden erkin asyp túsetin sekildi.