Keıingi eki jylda bıýdjet esebinen oblystyq jedel járdem stansasyna 60 sanıtarlyq avtokólik berildi. Onyń ishinde Hyundai, JAC, ÝAZ kólikteri bar. Al jaqynda atalǵan stansa taǵy 20 kólikpen tolyqty.
– Memleket basshysynyń tapsyrmasyna sáıkes medısına salasynyń materıaldyq-tehnıkalyq bazany nyǵaıtýǵa erekshe kóńil bólinip otyr. Ásirese halyqtyń ómirin saqtaýda úlken yqpaly tıetin jedel járdem qyzmetiniń jedeldigin arttyrýdyń mańyzy zor. Sanıtarlyq kólik parkin jańartýǵa baılanysty Jol kartasyn iske asyrý maqsatynda 20 jańa kólik berilip otyr. Oblystyq jedel járdem qyzmetiniń jańa kóliktermen tolyǵýy atalǵan stansa brıgadalarynyń jedeldigin arttyrady, – deıdi oblys ákiminiń orynbasary Jasulan Bısembıev.
Oblystyq medısınalyq jedel jərdem stansasynyń dırektory Azamat Erbolovtyń málimetinshe, qarjylyq lızıng shartyna sáıkes «Hyundai Trans Auto» seriktestiginen «S» sanatyndaǵy 10, «V» sanatymen 10 Hyundai H350 avtokóligi satyp alynypty. Jaqynda 5 JAC kóligi jetkiziledi. Jańa avtokólikter medısına qyzmetkerlerin shaqyrtýlarǵa barýǵa, pasıentterdi aýrýhanalarǵa jyldam jetkizýge, alǵashqy medısınalyq kómekti sapaly kórsetýge múmkindik beredi. Máselen, koronavırýs ınfeksııasynyń sharyqtaý kezeńinde jedel járdemge kúnine 1 myńnan asa qońyraý shalynǵan.
– Jedel jərdem stansasynyń medısınalyq kólik parki 2,5 esege ulǵaıdy. Jańa reanımobılder alǵashqy medısınalyq kómek kórsetý úshin barlyq qajetti jabdyqpen jabdyqtalǵan. Onyń ishinde ozyq úlgidegi defıbrıllıator, jasandy tynys alý apparaty, elektrokardıograf (EKG), taǵy basqa nemis jəne ıtalııalyq medısınalyq jabdyqtarmen jabdyqtalǵan. Bıyl jańa ǵımarattyń qurylysy bastalady. Aldaǵy jyly jedel járdem qyzmetkerleriniń jalaqysyn kóterý məselesi kózdelip otyr, – deıdi Azamat Erbolov.
Atyraý oblysy