Almatyda Baurzhan foundation qory uıymdastyrǵan «Kitap fest» kitap festıvali ótti. Qazaqstannyń jalǵyz kitap festıvali bolyp tabylatyn aýqymdy shara Almaty qalasy ákimdiginiń qoldaýymen 2013 jyldan beri jyl saıyn ótkizilip keledi.
Bıylǵy «Kitap fest» Balalar jylyna sáıkes keledi. Baurzhan qorynyń quryltaıshysy, jobany uıymdastyrýshy Juldyz Omarbektiń aıtýynsha, festıvaldiń basty maqsaty – oqyrman mádenıetin damytý, jazýshylar men olardyń oqyrmandary úshin biryńǵaı alań quryp, balalar men jastar arasynda kitapqa degen qyzyǵýshylyqty arttyrý.
«Kitap oqıtyn adam óziniń tanym kókjıegin, logıkasyn, oılaý qabiletin damytady. Jas-kári demeı, biz báriniń oqýǵa qyzyǵýshylyq tanytqanyn qalaımyz. Jyl saıyn kitap festıvalinde balalar men eresekter úshin aýqymdy baǵdarlama usynamyz. Armanymyz Qazaqstan boıynsha festıvaldiń aıasyn keńeıtý, óıtkeni qajettilik bar. Qazirdiń ózinde úlken jumys atqaryldy, alar asýlarymyz áli alda dep oılaımyn. Ádiletti Qazaqstanǵa oqıtyn jáne bilimdi jastar qajet. Sondyqtan da biz kitap oqýdy nasıhattaýdy jalǵastyramyz», dedi Juldyz Omarbek.
«Kitap fest–2022» aıasynda otandyq jazýshylar jańa kitaptaryn tanystyryp, kópshilikpen pikir almasty. «Oflaın kitaptar týraly» shatyrda tanymal balalar jazýshylary, blogerler jáne tabysty áıelder qaýymy óz tájirıbelerimen bólisti. Almatylyqtarǵa ıllıýstrasııalanǵan kitap kórmesi, sheberlik synyptary, túrli baıqaýlar men aksııalar, Qazaqstannyń iri baspalary men kitap dúkenderiniń jármeńkesi usynyldy. Baspagerler jáne ınternet-dúkenderi óz ónimderin kórmede 20% - ǵa deıingi jeńildikpen satty.
Balalarǵa arnalǵan oıyn-saýyq baǵdarlamasynda anımatorlar, teatr qoıylymdary, akvagrım men túrli qyzyqty baıqaýlar kelgen qonaqtarǵa tamasha kóńil kúı syılady.
Festıval qonaqtary sórege qoıylǵan kitaptarmen tanysýǵa, unaǵan kitaptardy jeńildikpen satyp alýǵa nemese olardy tolyǵymen tegin alýǵa múmkindik aldy. Bıylǵy kitap festıvalinde ártúrli janrdaǵy 3000-nan asa kitap tegin taratyldy.
Sondaı-aq festıvalde alǵash ret «Aýylǵa kitap» aksııasy ótkizildi, onda kez kelgen oqyrman óz kitabyn ákelip, Qazaqstannyń aýyldyq kitaphanalaryna tapsyrýǵa atsalysty.
«Kitap fest» festıvali on jylǵa jýyq ýaqyt dástúrli túrde ótkizilip kele jatqan mádenı-buqaralyq is-shara. Osy ýaqyt aralyǵynda ol shyǵarmashylyq kezdesýlerdiń negizgi alańyna aınaldy, jármeńkelerge 150-ge jýyq kitap dúkeni qatysty.
ALMATY