Keshe Qaraǵandy oblysynda aýa raıynyń qolaısyzdyǵynan bir kúnde 50 jol-kólik oqıǵasy oryn alyp, 17 adam zardap shekti, dep habarlaıdy Egemen.kz.
«Qaraǵandy-Qarqaraly tas jolynda kóktaıǵaq saldarynan eki jol-kólik oqıǵasy boldy. Birinshi apat saǵat 09:50-de tas joldyń 195 shaqyrymynda bolǵan. Ravon Nexia kóliginiń 50 jastaǵy júrgizýshisi qarsy jolaqqa shyǵyp ketip, KamAZ kóligimen soqtyǵysqan. Jol apaty saldarynan Ravon kóliginiń júrgizýshisi medısınalyq mekemege jetkizildi, 61 jastaǵy jolaýshy alǵan jaraqattarynan aýrýhanada kóz jumdy. Sondaı-aq saǵat 18:26-da Sheshenqara aýyly men Ashysý stansasy arasynda Lexus jáne Volkswagen Passat kólikteri soqtyǵysty. Saldarynan Volkswagen kóliginiń 62 jastaǵy júrgizýshisi oqıǵa ornynda kóz jumdy», dedi Qaraǵandy oblysy PD jergilikti polısııa qyzmetiniń bastyǵy Qýanysh Zárýbaev.
9 qarasha kúni saǵat 01:29 shamasynda Shahtınsk-Qaraǵandy tas jolynda «VAZ-217230» avtokóliginiń 22 jastaǵy júrgizýshisi rýldi basqara almaı, kópirdiń qorǵanysh qorshaýyna soqtyǵysyp, aryqqa aýdarylyp ketken. Zardap shekkender men qaza tapqandar joq.
Jol-kólik oqıǵasynyń barlyq faktileri polısııada tirkelgen.
«Biz kólik júrgizýshilerin Jolda júrý erejelerin qatań saqtaýǵa shaqyramyz. Júrgizýshilerge apatty boldyrmaý úshin aýa raıyna sáıkes jyldamdyq rejımin tańdap, belgilengen qashyqtyqty saqtaý usynylady. Sondaı-aq manevr jasaý erejelerin buzbańyz jáne jaıaý júrginshilerdi baıqańyz. Sondaı-aq jaıaý júrginshilerdi belgilenbegen jerden joldy kesip ótpeýge shaqyramyz», dedi Q.Zárýbaev.