12 qarashada A91(Qordaı) kóshesinen Astana – Qaraǵandy tas jolyna deıingi ýchaskede A62 kóshesi boıynda qozǵalys ashylady. Bul kóshe Qaraǵandy tas joly, «Nurly Jol» temirjol vokzaly, sol sııaqty qalanyń sol jaǵalaýy arasyndaǵy kólik qatynasyn qamtamasyz etýge múmkindik beredi, dep habarlaıdy Egemen.kz qala ákimdiginiń baspasóz qyzmetine silteme jasap.
Nájimedenov, Baıtursynov kóshelerindegi kólik keptelisi seıiledi. Sol sııaqty Qoshqarbaev dańǵyly, Aınakól kóshesi, Abylaıhan dańǵyly, Qobda kóshesi jáne taǵy basqa kóshelerdegi qozǵalys retteledi.
A62 kóshesi – 8 jolaqty. Qazir atalǵan kóshedegi jumystardyń bir bóligi aıaqtaldy. Osylaısha 4 jolaq boıynsha qozǵalys ashyldy. Qalǵan 4 jolaqty abattandyrý jumysy kóktemde jalǵasady.
Osyǵan deıin Uly dala boıyndaǵy jańa kópirdiń ústinde qozǵalys ashylǵan bolatyn. Uly dala dańǵylyndaǵy kópir Máńgilik el dańǵylyn, A.Baıtursynulyn, R. Qoshqarbaev, J.Nájimedenov kóshelerin, Nova City aýdanyn, «Myńjyldyq» aýmaǵynda kólik aǵynyn seıiltti. «Nurly jol» jańa vokzalyna, Telman jáne Promyshlennyı eldi mekenderine, METRO gıpermarketi aýdanyna, Jumabaev dańǵylyna, Júrgenov kóshesine jáne t.b. júrý múmkindigi jasaldy.
Taǵy bir kólik qozǵalysyna arnalǵan kópir (Esil ózeni arqyly Táýelsizdik dańǵylynyń boıynda) 2023 jyly ashylady. Bul kópir Táýelsizdik dańǵyly, jańa temirjol vokzaly aýdany, Qoshqarbaev dańǵyly, Nájimedenov kóshesi, Áziret Sultan meshiti aýdany, Baıtursynov kóshesi, Qordaı, Aınakól, Momyshuly dańǵyly jáne t.b. qosymsha baılanysty qamtamasyz etýge múmkindik beredi.
Sońǵy jyldary elordada 400-den astam kóshe jóndeldi, olardyń jartysy eldi mekenderde ornalasqan.