Almatydaǵy Radıoelektronıka jáne baılanys áskerı-ınjenerlik ınstıtýtynyń kitaphanasynda Qazaqstan men Qyrǵyzstan memleketteriniń mádenı qarym-qatynasyn nyǵaıtý maqsatynda kitap kórmesi uıymdastyryldy.
Is-shara ınstıtýttyń jeke quramyn qyrǵyz halqynyń ádebıeti, mádenıeti jáne salt-dástúrimen tanystyrýǵa baǵyttalǵan. Kórmege eki el arasyndaǵy tarıhı qarym-qatynastar týraly derekter men qyrǵyz jazýshylarynyń shyǵarmalary qoıyldy. О́z kezeginde qyrǵyzstandyq kýrsanttar mádenı baǵdarlama uıymdastyrdy, óleń oqyp, eki tilde án shyrqady.
– Eki eldiń túbi bir, tarıhy men mádenıeti de ortaq. Otanymyzdan shet júrsek te, qazaq elinde eshkim bizdi syrtqa tepken joq, qaıta jyly qabyldap, baýyrlaryna tartyp keledi. Alystaǵy ata-analarymyz da biz úshin alańdamaıdy, qazaq halqynyń baı mádenıeti men tarıhy janymyzǵa jaqyn, – deıdi ınstıtýttyń 5-kýrs stýdenti Alhanbek Bolkoev.
Is-shara barysynda baýyrlas qazaq pen qyrǵyz rýhanııatynda esimderi qatar atalatyn Jambyl men Toqtaǵul, Súıinbaı men Qataǵan, Áýezov pen Aıtmatov sekildi tuǵyrly tulǵalardyń shyǵarmashylyǵyna sholý jasaldy. Kýrsanttarǵa eki eldiń ótkeni men búgini, tarıhı sabaqtastyǵy týraly arnaıy ázirlengen beınematerıal kórsetilip, salt-dástúrlerine qatysty estafetalyq oıyndar oınatyldy.
Ujymdyq qaýipsizdik kelisimi uıymynyń baǵdarlamasy boıynsha áskerı ınstıtýtqa Qyrǵyzstan memleketiniń ókilderi de qabyldanady. Búginge deıin atalǵan áskerı bilim oshaǵyn 18 qyrǵyzstandyq kýrsant bitirip, 8 kýrsant bilimin shyńdap júr.
ALMATY