Elimizde tas joldardyń der kezinde jóndelmeýine bıtým tapshylyǵy sebep bolyp otyrǵany bıyl jıi aıtyldy. Merdigerler kóktem-jaz mezgilderinde jol tóseýge qajetti materıal tapshylyǵynan qıyndyq kóredi.
Munaıǵa tapshylyq joq elde bıtýmǵa degen muqtajdyq máselesin sheshý qajettigi Prezıdent Qasym-Jomart Toqaevtyń Joldaýynda da aıtyldy. «Men 2025 jylǵa deıin jergilikti joldardyń keminde 95 paıyzyn jaqsartý jóninde tapsyrma berdim. Úkimet bul máseleni tikeleı baqylaýǵa alsyn. Jol qurylysyndaǵy zańsyzdyqtardy anyqtaý qajet. Bul jumystan naqty nátıje shyǵarý kerek. Bizde áli kúnge deıin bıtým tapshy. Bul – iri kólemde munaı óndiretin el úshin, tipti uıat jaǵdaı», degen edi Memleket basshysy.
Bıtým tapshylyǵyn boldyrmaýǵa Tólebı aýdanynda ashylǵan «KazahBıtým» JShS-nyń munaı ónimderin óńdeý zaýytyndaǵy úzdiksiz polımerdi modıfıkasııalaý sehy óz septigin tıgizbek. Kıelitas aýyldyq okrýgi aýmaǵynda ornalasqan zaýyt jylyna 200 myń tonnadan astam ónim óndirýge qaýqarly. Joba quny – 550 mln teńge. Sehta jol jóndeý jumystaryna qoldanylatyn erekshe qospa óndiriledi.
Jańa óndiris ornynyń ashylý rásimine qatysqan oblys ákimi Darhan Satybaldy óńirde kásipkerlik salasyn tıisti ınfraqurylymmen qamtamasyz etý boıynsha jumys júrgizilip jatqanyn atap ótti.
«Memleket basshysynyń «10 myń turǵynǵa 100 turaqty jumys oryndaryn ashý» jónindegi tapsyrmasyna sáıkes, oblysymyzda 10 myńnan astam jańa jumys ornyn ashý josparlanýda. Sonymen qatar Prezıdent avtojol qurylysyna, sonyń ishinde jergilikti joldardyń sapasyna basa mán berý keregin aıtqan bolatyn. 2025 jylǵa deıin joldardyń keminde 95 paıyzyn jaqsartý jóninde tapsyrma berdi. Bizde áli kúnge deıin bıtým tapshylyǵy bar. Aýdan aýmaǵynda jumys istep turǵan zaýyttyń jumysyn jandandyrý arqyly oblysta osy máseleni sheshemiz. Búgin iske qosylǵan polımerdi modıfıkasııalaý sehynyń mańyzy joǵary», dedi oblys ákimi.
Jol jumystarynda keńinen qoldanylatyn bıtýmnyń bir ereksheligi – aýa raıynyń kez kelgen temperatýrasyna beıim. Jol tósenishiniń birkelkiligin jáne túrli deformasııalanýdan saqtaıdy. Polımerli bıtýmdy paıdalanatyn asfaltbeton qospasy joldy tozyp ketýden qorǵaıdy. Sehta jergilikti turǵyndar turaqty jumyspen qamtylǵan.
Aıta ketelik, aýdanda kásipkerlik salasynda jumys istep turǵan sýbektiler sany – 7 882, bul salada 16 699 adam jumyspen qamtylǵan. Kishi jáne orta bıznesti damytý úshin jyl basynan jeke azamattarǵa 3 mlrd 921 mln teńgeniń nesıesi berildi. «Bıznestiń jol kartasy-2025» bıznesti qoldaý men damytýdyń memlekettik baǵdarlamasy sheńberinde jańa bıznes-ıdeıalardy iske asyrýǵa memlekettik granttar berý boıynsha aýdannan 38 joba qatysyp, onyń ishinen irikteýden jalpy 10,0 mln teńgege 2 joba ótken. Jobalar jyldyń sońyna deıin «Damý» qory arqyly qarjylandyrylady. Sondaı-aq aýdanda «Jaıly mektep» ulttyq jobasy aıasynda birneshe mektep salynady. Leńgirde – 1 500 oryndyq, Birinshi Mamyr eldi mekeninde – 1 500, Dostyqta – 900, Kóksáıek aýylynda – 600, sondaı-aq Qosaǵashta 600 oryndy jańa mektepterdiń kurylysy josparlanyp otyr. Al «Aýyl – el besigi» jobasy aıasynda 2022 jyly 6 eldi mekende 6 joba iske asyrylýda. Aýdannyń ınjenerlik ınfraqurylym júıesin damytý maqsatynda 19 bıýdjettik ınvestısııalyq joba júzege asyrylýda. Aýdan halqynyń 99,8%-y aýyz sýmen, 109 myń turǵyn tabıǵı gazben qamtylǵan. Leńgir qalasynda 5 qabatty 20 páterli turǵyn úıdiń qurylys jumystary júrgizilýde.
Túrkistan oblysy