Júk kóliginen qulap, aıaǵy jansyzdanǵan qostanaılyq turǵynǵa elordadaǵy Ulttyq ǵylymı travmatologııa jáne ortopedııa ortalyǵynyń dárigerleri erekshe ota jasady, dep habarlaıdy Egemen.kz Áleýmettik medısınalyq saqtandyrý qorynyń baspasóz qyzmetine silteme jasap.
Qostanaı oblysy Rýdnyı qalasynyń turǵyny 2022 jyldyń maýsym aıynda jumys ýaqytynda júk kóliginen sekiremin degende, aldyńǵy jaraqatynyń saldarynan aıaǵy jansyzdanyp, júk kóliginiń astyna oń aıaǵymen qulap, aýyr jaraqat alady. Sol mezette jedel járdem shaqyrylyp, azamat jergilikti kópsalaly aýrýhanaǵa jetkizilgen.
5 aı ýaqyt aralyǵynda aýrýhanada bolǵan naýqastyń aıaǵyn saqtap qalý úshin oǵan Ilızarov apparaty qoıylypty. Sonymen qatar osy aralyqta birneshe aýyr ota jasalyndy. Pasıentti ári qaraı emdeý maqsatymen Rýdnyı qalasynyń kópsalaly aýrýhana dárigerleri telemedısına arqyly akademık N.J.Batpenov atyndaǵy Ulttyq ǵylymı travmatologııa jáne ortopedııa ortalyǵynyń mamandarymen baılanysqan. Pasıent jaıly tolyq aqparat naqtylanǵan soń, ony Astana qalasyna jetkizý usynyldy.
«Sóıtip, qazan aıynyń sońynda pasıentti bizdiń ortalyqqa jetkizgennen keıin, bólimshe dárigerleri ony tolyq qarap, onyń jaǵdaıyn oılasty. Konsılıým barysynda aldymen teri transplantasııasyn jasaımyz, sodan soń naýqasqa osyǵan deıin ornatqan Ilızarov apparatyn sheship, oń aıaǵyna basqa jolmen bekitý týraly sheshim qabyldandy. Jáne de, aıta ketý kerek, emniń bári MÁMS júıesi sheńberinde jasalynyp jatyr», deıdi akademık N.J.Batpenov atyndaǵy Ulttyq ǵylymı travmatologııa jáne ortopedııa ortalyǵynyń №4 travmatologııa bólimshesiniń dárigeri Álııa Atapıleva.