Túrkistan oblysynda sot esirtki saqtaýmen aınalysqan zeınetkerge qatysty úkim shyǵardy, dep habarlaıdy Egemen.kz.
Er adam Qazaqstan Respýblıkasy Qylmystyq kodeksiniń 296-baby «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» boıynsha kináli dep tanyldy.
Buǵan deıin «Qarasora» jedel aldyn alý is sharasy aıasynda Túrkistan oblysy IID Esirtki qylmysyna qarsy kúres basqarmasynyń qyzmetkerleri esirtki zattaryn saqtaǵan kúdiktini ustaǵan bolatyn. Keles aýdanyndaǵy aýyldardyń birinde polıseıler «Lada Prıora» kóligin toqtatty. Tintý kezinde tergeýshiler ósimdik tektes zat salynǵan sómke tapty. Alynǵan dáleldeme saraptamaǵa jiberildi. Qorytyndyǵa sáıkes, tárkilengen esirtki zaty jalpy salmaǵy 1 keliden asatyn «kóknar» bolyp shyqty.
Kúdikti Maqtaaral aýdanynyń turǵyny ekeni anyqtaldy. Qart óz áreketin moıyndap, esirtkini ózi tutynýy úshin saqtaǵanyn túsindirdi. Jınaqtalǵan sotqa deıingi tergep-tekserý materıaldary aıyptaý aktisimen birge zańdy sheshim qabyldaý úshin sotqa joldandy. Sot úkimimen sottalýshy 3 jylǵa bas bostandyǵyn shekteý jazasyna kesildi.