Gúlzeınep Sádirqyzy: «Egemen» – ómirim, Sheraǵam – ustazym!

– Áriptester arasynda Gúl­zeınep Sádirqyzy «Aıdy aspanǵa shyǵaryp Sheraǵamnyń 90 jyldyǵynda bas júldeni jeńip aldy» degen dúrildegen áńgimeniń aryny áli kúnge deıin basylmaı tur. Biz muny qalam ustaǵan qaýymnyń ózińizge degen shynaıy qurmeti men shyn yqylasy dep oılaımyz. Taǵy da... qutty bolsyn aıtamyz!

– Rahmet. Kóp quttyqtaý, madaq­taý estidim, estip te jatyrmyn... «Ana tiliniń» bas redaktory, belgili qalamger Qalı Sársenbaıdyń bas báıgege qatysty Sheraǵamnyń týǵan jeri Jýalyda maǵan arnap aıtqan «Búgin rasynda da aqıqattyń aq týy kóterildi. Sheraǵańnyń aty atalǵan jerde tek shyndyq júrýi kerek qoı. Shirkin, Sheraǵańnyń rýhy» degen sózi unady. Rasynda da, shyndyq ataýlynyń almas qylyshyndaı jarqyldaǵan Sher­han Murtazanyń atyndaǵy báıgege – uly dúrmekke qo­syl­ǵandaǵy bar oıym, uly sýret­kerdiń, ulaǵaty ulan-ǵaıyr us­tazymyzdyń rýhyn kóterýge arnalǵan ıgi sharadan shet qalmaı, iltıpatpen úles qosý ǵana bolatyn. 

О́te tanymal bir aǵamyz sol toıda maǵan alaıa kóz tastap, meni tanymaıtynyn ańǵartyp, mysaly, «meni kúlli qazaq biledi, sen kimsiń, qaıdan shyqqansyń?» degendi astarlamaı ashyq jetkizdi. Qatty yńǵaısyzdanyp qaldym. «Men «Egemen Qazaqstannyń» burynǵy tilshisimin, Sheraǵańnyń shákirtteriniń birimin» dedim. Álgi kisi sabasyna túsken sy­ńaı­ly. Shirkin, «Egemenniń», Sher­aǵamnyń mysy-aı deseńizshi, áıtpese, álgi aǵamyz taptap ketýge ázir tur. Endi biri «Bas júldeni qalaı aldyń...» deýden de taıynbady. Sonda qalaı bas júldeni ózderinen basqalar almaýy kerek pe... Túsinbedim...

– Qaraqyzdyń «Egemen Qa­zaq­standa» qara qyldy qaq ja­ryp, aqıqattyń jarshysy bolǵanyn bilmeıtin boldy ǵoı ol aǵamyz. Al jaraıdy, bil­meı­tinderge bildireıik, jalpy siz «Egemen Qazaqstanǵa» qa­laı keldińiz, áńgimeni sodan bas­taıyqshy?!

– Osy kıeli shańyraqta taban aýdarmaı 45 jyldan astam ýaqyt qyzmet etippin. «Sosıalıstik Qazaqstanǵa» tarydaı bolyp kirip edim, «Egemen Qazaqstannan» taý­daı bop... zeınet demalysyna shyqtym deıtinim bar. Týǵan aýyly­m Aqterekten mektep bi­tirip Almatyǵa shyqqandaǵy bar oıym – ekonomıst-qarjyger bolý edi. Baıqaýda balym jetpedi. Bir jyldy qur ótkizgenshe dep stenografıster ýchılıshesine tústim. Úzdik bitirdim. Oqýdy támamdaǵan 30 qyzdyń ishinde úsh qyz ǵana naǵyz stenografıstka degen ataq aldyq ta, qalǵandary mashınka basýmen shekteldi. Ol kezde búgingideı jýr­nalısterdiń qolynda dıktofon joq. Barlyq jınalys, sezd, talqylaýdy ste­nografıst ma­man­dar ǵana hat­taıtyn. Qazaq ra­dıosynyń «Shalqar» redaksııasyna joldamamen kelip, iske qyzý kirisip kettim. Birde «Sosıalıstik Qa­zaqstan» gazetiniń redaksııasy Talǵarda ótken sot prosesiniń stenografııasyn túsirip berýimdi ótindi. Tap-tuınaqtaı etip ja­saǵan qyzmetim qatty unaǵany ǵoı, sol kezdegi gazet redaktory Sapar Baı­janov jumysqa ma­mandyǵym bo­ıynsha oılanbas­tan qabyldady. Sóıtsem, jastary jetpisten asqan redaksııadaǵy qos apama «ornyn basar» kerek bop turǵan sát eken. Qazaq ste­nografııasynyń negizin sal­ǵan Danabıke Baıqadamova men áıgili memleket qaıratkeri Oraz Isaevtyń kelini Márııam Isae­vanyń kásibı sheberlik tár­bıesin kórip úlgerdim.

– Kúndelikti shyǵatyn respýb­­lıkadaǵy bas basylym­nyń ste­nografısine tilshilik jazý-sy­zýǵa sińisý ońaı bola qoımasy anyq. Ýaqyt tap­shy­lyǵyn qa­laı jeńip júr­gensiz?..

– Kishkentaıymnan ádebıetke qumarlyǵym bir tóbe, qan maıdanda kóp qıyndyq kórgen soǵys ardageri ákem jaryqtyq óte saýat­ty kisi bolatyn, aýdandyq gazetten bastap, elimizdegi barlyq ga­zet-jýrnalǵa bir aılyǵyn tólese de birin qaldyrmaı jazylyp turatyn. Ol basylymdardy biz de «kemirip» oqydyq. Osynyń barlyǵy meniń shyǵarmashylyq ortaǵa tez boı úıretýime septigin tıgizdi. Talpynyp, izdenip maqala jaza bastadym. О́zimizdiń QazMÝ-diń jýrnalıstıka fakýltetin syrttaı oqyp bitirip te aldym. Ara-tura áńgime jazýǵa ýaqyt tap­tym... Gazettegi ekinshi redaktorym Balǵabek Qydyrbekuly, ol kezde birinshi orynbasar qyz­metinde edi, meniń jýrnalıstik talabymdy baıqap qaldy da birde ózine shaqyrdy. «Qaraǵym, jazǵandaryńdy oqyp júrmiz, jap-jaqsy dúnıeler, ókinishtisi... seni bólimge qyzmetke ala almaımyz. Tilshi tabylar, biraq sendeı stenografıst maman taba almaımyz. Degenmen saǵan «stenografıstka-jýrnalıst» degen kýálik bereıik, tıisti oryndardan derek alǵanyńa jeńil bolsyn. Jazýyńdy da toqtatpa» dedi. Qyzmette qatal óte kirpııaz ári tóńiregindegi qyzmetkerlerine óte ádil qaraǵan Balǵabek aǵa – gazettegi ekinshi redaktorym, jaryqtyq anam dúnıe salǵanda úshinshi redaktorym Sherhan aǵa ekeýi úıge kóńil aıtyp keldi. Sondaǵy Balǵabek aǵanyń aıtqany esimde qalypty: «Gúlzeınep, aınalaıyn, saǵan obal jasappyn... Myna Sherhan meniń qateligimdi túzedi...

– Al endeshe, mine... úshinshi aqıyq redaktoryńyzdyń aýylyna da at basyn tirelik, sizdiń ba­sylymdaǵy «jasyndaı jar­qyl­daıtyn» kezińiz de osy tus qoı, qatelespesem...

– Seń sol úshinshi redaktordyń kelýimen buzyldy ǵoı... Men ǵana deısiz be, sol jyldary qan­shama qazaqtyń myqty jýr­nalısteri osy gazetten túlep shyqty, qýaty tóńkeris jasaıtyn qanshama maqala dúnıege keldi. Gazetimiz naǵyz ta­rıhı qubylystyń qozǵaýshy kú­shine aınaldy. Qanshama qo­ǵam­dyq, memlekettik ınstıtýttar aılap-jyldap sheshetin ulttyq múddege qatysty kókeıkesti másele­lerdi bir ǵana «Egemen Qazaqstan» gaze­tiniń redaksııasy – onyń qaı­sar redaktory qysqa merzim ishinde «tóńkerip, sheship» tastady. Halyqtyń aýzynda «Egemen» men «Sherhan, Sheraǵa...» júrdi. Búgingi «Sheraǵańnyń shekpeninen shyqqandarmyz» deıtin bir býyn dál sol jyldary qanat qaqqandar. Qyzmetkerlerin tyń taqyryptar, kúıip turǵan problemalar jazýǵa úndep, «tiri dúnıeler... tiri dúnıe­ler ákelińder» dep otyratyn edi, jaryqtyq, redaktorlardyń redaktory atanǵan Sheraǵamyz. Kóp uzamaı-aq gazet basqa reńk ala bastady. «SQ-nyń» siresken seńin buzyp: «Sender jazýyn jazyp, aıtýyn aıtsańdar, bas­pasam maǵan sert» dep, joǵary jaqqa jaltaqtamaı, «úlken úımen» aqyldaspaı nebir ótkir problemalyq maqala, feletondardy basyp, Ortalyq Komı­tetke shaqyrsa ózi baryp, maqalany da, avtordy da qorǵap shyǵatyn.

– Jýrnalısti tanytatyn onyń jazǵany ǵoı, siz ben biz bul qaǵı­dany jaqsy bilemiz. Talaby da talǵamy da zor qa­lam­gerdiń nazaryna siz qalaı iliktińiz? Ol kezde burynǵy ári partııanyń, ári memlekettiń únqaǵazyna aı­nalǵan bas gaze­timizge qyz bala­lardy tehnı­kalyq qyzmetke qabyl­dama­sa, tilshilikke alýdyń qı­yndyq­tary bolǵany basy ashyq jaıt edi ǵoı?!

– Meniń eń alǵashqy «Áıel jany» atty áńgimem «Qazaq áde­bıeti» gazetine Sherhan Mur­taza sonda redaktor bolyp turǵan kez­de basyldy. Keıin bizdiń gazetke redaktor bolyp kelgende buǵan deıin júzbe-júz kezdes­pegen aǵamyz kezinde áńgimemdi jyly qabyldasa kerek, «E, sol áńgimeni jazǵan sen bala ekensiń ǵoı» dep, qabaǵyn kerip turyp aıtqany bar. Kóp uzamaı Sheraǵań ózi jaqsy kóretin, aq myltyq jýrnalıst Qaınar Oljaıdy shaqyryp: «Osynda isteıtin ana Gúlzeıneptiń áıel týraly jazǵan jaqsy bir áńgimesin bilemin. Sol balaǵa áıel taqyrybyna qatysty tapsyrma berip kórshi» degen ǵoı. О́zim úshinshi perzentimdi aýyr bosanyp, perzenthanadaǵy soraqy jaǵdaıdy basymnan ótkizip, jumysqa jańa ǵana shyqqan kezim. «Perzenthana perdesi... ta­laı syrdy búrkep tur...» degen serııaly maqalam gazettiń úsh nómirine basyldy. Sheraǵań sosyn Qaınarǵa: «Endi shopan áıeliniń problemasyn kóterip kórsinshi» dep sálem aıtypty. Aýylda ósken ári qoıshynyń kelini bolǵandyqtan, shopan áıeliniń beınetin jaqsy bilemin, «Aıdalada aq otaý...», sosyn kópbalaly analar týraly «Aty ǵana ardaqty ma?» degen kólemdi problemalyq maqalalarym ja­ryq kórdi. Endi taǵy bir tapsyrma bergisi kelip shaqyrǵanda Qaınar: «Sheraǵa, qyzyqsyz, ol kisi tehnıkalyq qyzmetker, tapsyrma berýge quqymyz joq, odan da hat bólimine tilshi etip alyp, jumsaı bereıik te» deıdi. «E, munyń jón eken, bul balaǵa obal jasamaıyq» dep, sózge kelmeı meni bólimge aldy. Sheraǵań meni ábden synap, óz eleginen ótkizip, jaraý attaı daıyndap baryp, ádebı qyzmetker etip alǵanyna arada otyz jyl ótse, qazaq baspasóziniń qara shańyraǵy «Egemen Qazaqstannyń» bir ǵa­syrlyq jylnamasynda jarty ǵasyrǵa jýyq shejiresine tikeleı kýá bolǵanym, oǵan hal-qaderimshe úlesimdi qosýym – árkimniń peshe­nesine jazyla bermeıtin múmkindik, baq dep bilemin.

– Osy oraıda «Egemen Qa­zaq­­­stannyń» kúlli ujymy – burynǵy, keıingi býyny osy kúnge deıin áste aýzynan tastamaıtyn sizge qatysty «qyzyl shapan» týraly estelikti jań­ǵyr­­týdyń oraıy kep tur, qalaı qa­raısyz?

– Iá, ıá... ol da bir qyzyq dáýren, umytylmas kúnder! Birde gazette bas redaktordyń orynbasary, belgili qalamger marqum Sabyrjan Shúkirdiń «Kishi oktıabr» degen ataqty syn maqalasy jaryq kórdi. Onda Almaty oblysy, Shelek aýdany Sarybulaq keńsharynyń dırektory zańsyz qyzmetinen alǵandyǵy jóninde aıtylyp, avtor óz keıipkerin aqtap shyǵady. Maqala Ortalyq Komıtette qaralyp, keńshar dırektory qaıta qyzmetine kirisedi. Mine, sol keńshar basshysy «SQ»-ǵa alǵysy retinde búkil ujymdy aýylǵa shaqyryp, oqyrmandarmen kezdesý uıymdastyrdy. Kezdesýge tek shyǵarmashylyq top barmaq. Sabyrjan aǵaı maǵan kelip: «Qara­qyz, kezdesýge sen de júr. Sheraǵańa áli úırenise almaı jatyrmyz... Ujym Sheraǵańmen alǵash ret kezdesýge bara jatyr. Oqyrmandarǵa dom­byramen án salyp berseń... – dep qolqalady. О́zim de dekrettik demalystan jańa shyǵyp, ujymdy saǵynyp kelgen kezim, kelise kettim.

Bylaısha aıtqanda, alystaǵy bir aýylda oqyrmandarmen kezdesýden keıingi dastarqan basynda «Sheraǵańmen kezdesý... ujym­nyń bas redaktorymen alǵash ret jaqyn júzdesýi» deıikshi... bas­taldy. Jurt tym-tyrys. Tórde Sheraǵań men Shelek aýdany dókeı basshylarynyń biri otyr. Anda-sanda ǵana Sheraǵań fototilshi Sıez Básibekov aǵaıdy «Bul Syrym Datulynyń urpaǵy...» dep sózge tartady. Ánsheıinde otyrystarda ázil-qaljyńnyń maıy­n tamyzatyn aǵaılar momaqan. Sheraǵańnyń mysy-aı... Ánshi Nurlan О́nerbaev arasynda gıtaramen án salyp qoıady. Sodan bir kezde Sheraǵammen qatar otyrǵan aýdandyq atqarý komıteti tór­aǵasynyń aldyna ys­tyq shaı quıylyp ketpesi bar ma. Tóraǵa óte yńǵaısyz jaǵdaıda. Eshkim «lám-mım» demeıdi.

Men ózi minezim ashyq, ázil-qal­jyń janyma jaqyn bolǵan­dyqtan, eshkimdi jatyrqamaı erkindeý sóı­leıtinim bar. Keıde osy minezimniń paıdasy bolsa, keıde artyq ketip qaldym ba dep ózimdi jek kóretin kezderim de joq emes. Dastarqan basynda óli tynyshtyq. Myna únsizdikke shydamaı, ne bolsa ol bolsyn dedim de: «Aý, tóraǵa, kúıip qalǵan joq pa? Aman ba? Bol­masa erteń «SQ»-ny aıyptap júrersiz», – degenim sol eken, ázer tyǵylyp otyrǵan jurt dý kúl­sin. Sheraǵańnyń erkeleı kúletin kúlkisi bar eken, toqtamaı kúlip jatyr. Sodan áńgimeni ilip alyp, attyń basyn jibereıin. Bir kezde Sheraǵań: «Volchısa! Myna bala qasqyr ǵoı...» dep suq saý­saǵymen asqan rızalyqpen meni nusqady. Odan ári erkinsip, arasynda dombyramen de, gıtaramen de án salyp qoıamyn. Otyrys qyzyp, emen-jarqyn áńgime ketti. Sheraǵań tatarsha án aıtyp, bir este qalarlyqtaı ádemi kesh boldy.

Qaıtyp kelemiz. Gý-gý áń­gime. Kóńildimiz. Jolǵa sarqyt alǵanbyz. Aramyzda sol aýdan­nyń qyzy, tilshi, marqum Sáýle Ilimtonova: «Jigitter, osy kúre joldyń boıynda Búrkittiń eskertkishi qoıylǵan sýaǵarǵa toqtap, bir demalyp alsaq» degen. Mejeli jerge jetip, jigitter sarqytqa bas qoıǵanda, sý alýǵa alańqaıǵa shyqsaq, Sheraǵańnyń kóligi tur. Burynǵydaı emes jigit­terimiz de batyldanyp alǵan, Sher­aǵańdy qaýmalap ortaǵa alyp, tura-tura qaldy. Sheraǵam júrgizýshisine «shapandy ákelshi» dedi. Júrgizýshi júgirip baryp ákele qoıdy. Sosyn jaılap: «Al jigitter, búgingi kezdesý de, otyrys ta jaqsy ótti. Qyzym, búgin sizge óte rıza boldym. Baıaǵyda Narynqoldan bir top jazýshy kele jatyp, osy Búrkittiń basynda Ǵabeń – Ǵabıt Músirepov úlken jıynnan kıip kele jatqan shapanyn, «osy qarabalaǵa kıgizsem» dep, ıyǵyma japqan edi. Búgin men sol dástúrdi jalǵastyryp, shapanymdy qaraqyzǵa japsam deımin. Aıtyńdarshy, búgin osy qyzymyz otyrysty gúldendirip jiberdi emes pe» dep ıyǵyma qyzyl shapanyn japty.

– Rasynda da ǵajap este­lik... Kózi qaraqty qaýym, onyń ishinde qalam­das-árip­testerińiz so­naý 1991 jylǵy Táýelsizdiktiń eleń-alańynda sizdiń Lenıngrad shaharyna baryp «Tý etý men tul etý» at­ty jazǵan serııaly ma­qa­la­ńyzdyń dúmpýin osy kúnge deıin umytqan joq. Búgin sol bir qyzyqty oqıǵany eske al­ǵa­ny­myz oryndy bolar deı­min?!

– 1991 jyly Keńes odaǵy ydyrap, sosıalıstik júıe kúırep, res­pýblıkalar táýelsizdik ala bas­taǵan tusta tarıhı tulǵalar týraly árqıly pikir aıtyla bastady. Osy arada Sankt-Peterbýrgtegi Jambyl atyndaǵy kósheniń atyn ózgertý kerek degen belgili bir toptyń eldi dúrliktirgen keleńsiz pikirleri týraly Qazaq radıosynyń kezekti habarynan estip qaldym da, redaksııaǵa jet­kizgenim sol, Sheraǵam issa­parǵa attandyrdy da jiberdi. Bólim bastyǵym belgili jýrnalıst Rysbek aǵa Sár­senbaıuly Jambyl babamyzdyń zıratynan «qandaı zaman bolady, shúberekke bir ýys topyraq túıip alýymdy» ótindi. Sol topyraqty ómir­de kórmegen jat qalada kezinde soǵysta «Lenıngradtyq óren­derim» atty ýytty jyry elge qor­ǵanys-qalqan bolǵan Jambyl atyndaǵy kóshe boıyndaǵy gúlzarda ósip turǵan jas taldyń túbine salyp turyp, arýaqtardan endigi beı­bereketsizdikten atamyzdy qorǵaýǵa nıet ettim. Sodan salyp uryp, Lenıngrad qalalyq atqarý komıteti janyndaǵy onomastıka jónindegi komıssııaǵa kelsem G.Nıkıtenko degen: «Eger Lenıngrad qalasynyń aty ózgerip jatsa, Jambyl kóshesiniń aty óz-ózinen alynyp qalady. Al 1978 jyly berilgen Á.Moldaǵulova atyndaǵy kósheni mindetti túrde ózgertemiz. Sebebi bizder osy esimdi aıtqanda da, jazǵanda da qat­ty qınalamyz. Ol qyzǵa ilin­gen taqta da jetkilikti. Al Jambyl kóshesiniń alyný-alynbaýy týraly burynyraqta sóz bolǵany ras. Bizdiń ádebıetshiler «óleń aýdarma, ony kimniń jazǵany belgisiz» degendi aıtýda» dep saırap tur. Shamam kelgenshe aıtysyp, osy kóshege ıelik jasaıtyn aýdandyq atqarý komıtetinde bolyp, jaǵdaıdy aıttym. Qaraqyzdyń Qazaqstanǵa qur qaıtpaıtynyn sezdi ǵoı deımin, ondaǵylar da jergilikti halyqpen birge ekenin aıtyp, shat-shálekeıi shyqty.

Osy ekpinmen Álııa oqyǵan Á.Moldaǵulova atyndaǵy №140 orta mektepke baraıyn. Murajaı bolǵan synypqa kirgenimizde oqýshylar murny tesilip, aýzy oıylǵan, beti syzylǵan Batyr áp­kemizdiń bıýstine kezek-kezek se­kirip minip, taırańdap júr. Mý­zeıdiń búkil zattaryn radıo­rýbkaǵa tyǵyp tastaǵan. Dırektordyń teris áreketterin aıtyp, Lenıngrad qala­lyq at­qarý komıteti janyn­daǵy Mý­zeı men kórkemsýret óneri bas­qarmasynyń bastyǵy B.Na­zarsev degenge kirip, ózim kýá bolǵan soraqy jaǵdaıdy jetkizdim. Kózi atyzdaı boldy. Aqtalyp álek. Qysqasy, «Egemen Qazaqstanda» 1991 jyly 30 tamyzda jarııa­lanǵan «Tý etý men tul etý» atty serııaly maqalam elimizde de, Reseıde de úlken qoǵamdyq pikir týǵyzdy. Kóp uzamaı qu­ra­mynda Krasnogvardeısk aýdan­dyq mádenıet komıtetiniń tóraıymy, sol aýdannyń halyqqa bilim berý komıtetiniń tóraǵasy bar arnaıy delegasııa Almatyǵa kelip, eki másele de sheshildi. Búginde «Bul tuıyq kóshe – Ekinshi dúnıejúzilik soǵys jyldarynda lenıngradtyqtardyń erligin jyrlaǵan qazaqtyń uly aqyny Jambyl Jabaevtyń qurmetine atalǵan» degen taqta ilinip, ózimiz kórgen gúlzarda Jambyl baba­myzdyń eskertkishi ornyqty.

– Árıne, keremet, myna isińiz erlikke bara-par... Meniń tań­ǵalyp otyrǵanym – barlyq til­shilik isterińiz aıbyndy bas redaktor Sheraǵamnyń aqıqat jo­lyn­daǵy redaktorlyq kúre­si­men sondaı bir jarasymdy úı­lesip turǵandyǵy!

– Aıtpańyz, aqyry bastap qaldyq, odan keıingi jyldary 21 jastaǵy beıkúná qyzdyń qazasyna oraı «Soqtasy solqyldaǵan syz­daýyq» atty syn maqalam Den­saýlyq saqtaý mınıstrligin táýbe­sine túsirgen. Sol kezdegi Baspasóz mınıstri Altynbek Sársenbaev «Egemenniń» sol nómirin qolyna ustap turyp, talaı basylymǵa úlgi etti. Maq­tandy demeńiz... Qandas­tary­myzdyń problemasy týraly «Kósh-kerýen keri bury­lyp ketpese eken...» degen maqalamnyń negizinde Parlamentte depýtat Ákim Ysqaqtyń bastamasymen tuńǵysh ret qazaq tilinde zań mátini qabyldandy. Mınıstr Korjova sharasyzdyǵyn mo­ıyn­dady. Qandastarymyz tarıhı Otanyn­da tuńǵysh ret ózderin óz elinde júrgendeı sezindi! «Mánshúk nege eki ret jerlendi?» degen maqalammen tanyssyz ba? Nege eki ret jerlendi, a? Aınalyp kelgende osynyń bári-bári dańqty Sher­aǵamnyń redaktorlyq mek­tebiniń arqasy!

– Sońǵy bir saýal, jýr­nalıstiń qolynan qalamy túspeıtini aqıqat... Deı tur­ǵan­men dál qazir nemen shuǵyl­danyp júrsiz, qaı baǵytta qalam terbep, ne jazyp júrsiz degendeı?

– Áıel jýrnalıstiń qaı kezde qoly bos bolǵan deısiz? Jas kezimizde bala-shaǵanyń, otaǵa­sy­nyń tamaǵyn toıdyryp, odan soń ydys-aıaqty jýyp bolǵan soń, tún aýǵansha sol as úıde jaılanyp otyryp alyp, erteńgi nómirge salynatyn maqa­lamyzdy jazýshy edik... Qazir qolymyz uzarǵan sekildi, biraq tirshiliktiń qolbaılaýy shash-etekten. Nemerelerge emire­nesiń... Áńgime jazyp júrmin! Us­taz atyna kir keltirmeýge qu­lyq­tymyz. Qolym qalt etkende úıdiń mańyndaǵy Esentaı ózenin jaǵalap, Alataýdy betke alyp serýendeımin. Esime Amerıka túsedi... «Egemenniń» arqasynda Nıý-Iorkte boldym. Brodveıdi sharladym. Manhettennen kólbeı sozylǵan jeli Bronksqa deıin jalǵasyp jatyr. Ańyzda bir zamanda osy soqpaqpen úndis taıpasynyń jigitteri sýatqa mal aıdaǵan deıdi. Esentaı ózenin jaǵalap taýǵa qaraı bir zamanda bizdiń atalarymyz da mal aıdaǵany aqıqat. Uqsastyqty aıtamyn. Áńgimege jeli me, jeli...

– Gúlzeınep Sádirqyzy, salı­qaly áńgimeńiz úshin úlken rahmet, jazaryńyz kóbeısin!

Talǵat SÚIINBAI,

arnaıy «Egemen Qazaqstan» úshin

ALMATY