Ortalyq saılaý komıssııasynyń tóraǵasy Nurlan Ábdirov kezekten tys prezıdent saılaýyn ázirleý men ótkizý máseleleri boıynsha Soltústik Qazaqstan oblysyna kelip, óńirdegi aýmaqtyq jáne ýchaskelik saılaý komıssııalarynyń jumysymen tanysty.
Petropavl, Mamlıýtka qalalary men Mamlıýtka aýdanyna qarasty Voskresenovka aýylyndaǵy saılaý ýchaskelerinde bolǵan Ortsaılaýkom basshysy aýmaqtyq jáne ýchaskelik saılaý komıssııalarynyń múshelerimen, sondaı-aq jergilikti atqarýshy organdardyń ókilderimen birqatar kezdesý ótkizdi.
N.Ábdirovtiń tóraǵalyǵymen ótken keńeste ýákiletti memlekettik organdar men oblystyq aýmaqtyq saılaý komıssııasynyń ókilderi óńirde júrgizilip jatqan jumystar, saılaýdy uıymdastyrýshylyq, materıaldyq-tehnıkalyq qamtamasyz etý, múgedektigi bar azamattar úshin saılaý ýchaskeleriniń fızıkalyq qoljetimdiligi úshin qajetti jaǵdaılar jasaý, saılaý bıýlletenderin kúzetý jáne ýaqtyly jetkizý týraly baıandady.
Oblys ákiminiń birinshi orynbasary Marat Tasmaǵanbetov baıandamasynda halyqty aqparattandyrý aıasynda izbiratel.sko.kz izdeý servısi iske qosylǵanyn habarlady. Sonymen qatar 13 aýdan men oblys ortalyǵynda «Telegram bot «SailauSkoBot» jáne Call-ortalyqtar bar. iKOMEK-109 biryńǵaı baılanys ortalyǵynyń bazasynda táýlik boıy Call-ortalyq jumys isteıdi.
Saılaý ýchaskeleriniń barlyǵy jabdyqtalǵan kabınalar, turaqty saılaý jáshigi, tasymaldanatyn saılaý jáshikteri, aqparattyq stendtermen qamtamasyz etilgen. Oblysta 26 myńǵa jýyq múgedektigi bar adam bolsa, onyń 2 239-y saılaý ýchaskelerinde erekshe jaǵdaılardy talap etedi. Nashar kóretin azamattardyń saılaý quqyqtaryn qamtamasyz etý maqsatynda obektilerde taktıldi kórsetkishter ornatylyp, Braıl shrıftimen jaraqtandyrylǵan aqparattyq kesteler qoıylǵan. Sondaı-aq 626 obektide múmkindigi shekteýli azamattarǵa qyzmet kórsetý aımaqtary uıymdastyrylady, al 502 saılaý ýchaskesin tirek-qımyl apparaty buzylǵan azamattardyń daýys berýine arnalǵan kabınalarmen jabdyqtaý josparlanýda. Daýys berý kúni «Invataksı» jáne áleýmettik taksı qyzmetteri de iske qosylmaq.
OSK tóraǵasy múgedektigi bar adamdar daýys beretin barlyq ýchaskelerdi aralap, daýys berýge arnalǵan úı-jaılardyń tek saılaýshylar emes, baıqaýshylar, senim bildirilgen adamdar jáne BAQ ókilderi úshin de qoljetimdi ári yńǵaıly bolýyn atap ótti.
Sapar aıasynda N.Ábdirov saılaýshylar men múgedektigi bar adamdar úshin ýchaskelerdiń kompıýter, aýdıo jáne beıneapparatýralar, qulaqqaptar, qosymsha jaryqtandyrý, lýpa sekildi qajetti quraldarmen qamtylǵan buryshtardyń bolýyn tekserdi. Eki satyly arba kótergish júıemen jabdyqtalǵan ýchaskelerdiń birin joǵary baǵalaǵan OSK basshysy barlyq ýchaskelerdi osylaı jabdyqtaý qajettigin aıtty.
Basqa saılaý ýchaskesinde daýys berýge arnalǵan jáshikterdiń yńǵaısyz ornalasýyna baılanysty OSK basshysy baıqaýshylarǵa, senim bildirilgen adamdarǵa, buqaralyq aqparat quraldarynyń ókilderine kedergisiz baıqaýǵa múmkindik beretindeı etip qoıýdy usyndy. О́z kezeginde ýchaskelik komıssııalardyń músheleri Ortalyq saılaý komıssııasy ázirlegen ÝSK músheleri toltyratyn ártúrli jýrnaldyń joǵary sapasy men yńǵaılylyǵyn atap ótti.
Ýchaskelerdi aralaý kezinde OSK basshysy jergilikti atqarýshy organdardyń nazaryn saılaý ýchaskeleri ornalasqan úı-jaılardy rezervtik elektrmen jabdyqtaýdy jáne olardy jylýmen jabdyqtaýdy qamtamasyz etýge aýdardy. Sondaı-aq saılaýshylarǵa tizimderde ózderin tekserýge múmkindik beretin onlaın servısterdiń jumysyn tekserip, saılaý komıssııalary músheleriniń elektoraldyq oqytý nátıjelerimen tanysty.
Baǵdarlamanyń ekinshi bóliminde aýmaqtyq jáne ýchaskelik saılaý komıssııalary úshin keıs tehnologııasy negizinde iskerlik oıyn túrinde trenıng ótti. Trenıng jumysyna EQYU/DIAQB baıqaýshylar mıssııasynyń ókilderi qatysty.
О́tkizilgen kezdesýlerdiń qorytyndysy boıynsha Nurlan Ábdirov aýmaqtyq jáne ýchaskelik saılaý komıssııalarynyń tóraǵalaryna birqatar naqty tapsyrma berdi.