Qazaqstan Respýblıkasy prezıdenttigine kandıdat Nurlan Áýesbaev elordadaǵy jataqhanalardyń birine baryp, turǵyndarymen kezdesý ótkizdi.
Is-shara barysynda kandıdat jınalǵan qaýymǵa óziniń saılaýaldy baǵdarlamasynyń basym baǵyttary jóninde baıandady. Turǵyndar ózderin alańdatqan ózekti problemalardyń baǵdarlamada kórinis tabýyn jyly qabyldady. Ásirese, máselelerdi sheshý joly kórsetilgeni qýantady. Kezdesýde turǵyndar ózderin alańdatqan suraqtarǵa tolymdy jaýap aldy.
Jıynda Qazaqstannyń syrtqy saıasatyna qatysty saýal qoıyldy. Nurlan Áýesbaev strategııalyq salalarda Qazaqstan qalypty proteksıonızmdi ustaný qajet dep esepteıdi. N.Áýesbaev memleket aldynda turǵan basty másele jemqorlyqpen kúres ekenin atap ótti. Úmitkerdiń pikirinshe, ol úshin eń aldymen saıası reformalardy júzege asyrý kerek jáne Májilistiń rólin kúsheıtý kerek.
Sondaı-aq úmitker bilim berý salasy memleket tarapynan aıryqsha nazardy talap etetinin aıtty. Medısına jáne bilim berý salalaryna IJО́-den jylyna eń kemi 5-7%-dy bólýdi usyndy. Jalpyulttyq sosıal-demokratııalyq partııa ókili mundaı shara dárigerler men muǵalimder eńbekaqysynyń bank qyzmetkerleri deńgeıine deıin kóterýge múmkindik beretinin aıtty. «Munyń mańyzy zor, sebebi bul mamandar adamı kapıtaldyń sapasyna jaýap beredi, al bul óz kezeginde otandyq ekonomıkany damytý úshin negizgi talap bolyp sanalady», dedi N.Áýesbaev.