Petropavl qalasynyń Polısııa basqarmasynda 2011 jyly Taraz qalasynda lańkesti ustaý kezinde erlikpen qaza tapqan polısııa kapıtany Ǵazız Baıtasovqa eskertkish taqta ashyldy, dep habarlaıdy Egemen.kz.
11 jyl buryn 11 qarasha dál osyndaı juma kúni edi. Bul kúni patrýldik polısııa batalonynyń qyzmetkeri Ǵazız Baıtasov qalypty rejimde qyzmet atqarǵan, biraq bul onyń sońǵy jumys kúni ekenin bilmegen.
Senbi, 12 qarashada muzdaı qarýlanǵan lańkes Taraz qalasynda asa aýyr qylmystar jasap, jeti adamnyń ómirin qıǵan. Onyń beseýi – quqyq qorǵaý organdarynyń qyzmetkerleri. Lańkes qol granatasyn jarýǵa áreket etken kezde Ǵazız Baıtasov halyqty qaýipten aman alyp qalý úshin qylmyskerdi jerge qulatyp, óz denesimen granatany japty... Erlikpen qaza tapqan tártip saqshysyna «Halyq Qaharmany» ataǵy berildi.
Keshe óńirdegi Petropavl qalalyq Polısııa basqarmasynyń ǵımaratynda onyń esimi jazylǵan eskertkish taqta ashyldy. Ashylý rásimine oblystyq polısııa departamenti jáne qalalyq polısııa basqarmasynyń basshylyǵy, PB jeke quramy, vedomstvo ardagerleri, oblystyq jáne qalalyq memlekettik organdardyń basshylary, jurtshylyq ókilderi qatysty. Qala ákimi Rýslan Ańbaev polısııa qyzmetkerlerine árdaıym úılerine aman-esen oralýdy tiledi. Oblys prokýrory Baǵban Taımbetov 12 qarasha kúni bolǵan oqıǵanyń kýási bolǵanyn aıtty. SQO Polısııa departamentiniń bastyǵy polısııa polkovnıgi Aıdyn Qabduldınovtyń aıtýynsha, Ǵazız Baıtasovtyń erligi batyrlyq pen Otanǵa adal qyzmet etýdiń úlgisi retinde Qazaqstan polıseıleriniń esinde máńgi saqtalmaq.
Qonaqtar, aqsaqaldar men polısııa qyzmetkerleri bir mınýt únsizdikpen eske alyp, eskertkish taqtanyń janyna gúl shoqtaryn qoıdy.