Eger ǵaıyptan taıyp jolyńyz túsip, osy kúnderi Almaty oblysy Eńbekshiqazaq aýdany Aqshı aýylyna bara qalsańyz, ótken ǵasyrdan búgingi zamanǵa top etip túse qalǵandaı eski aýyldy kóresiz. О́ıtkeni Aqshı aýylynyń mańynda belgili rejısser Talǵat Temenovtiń «Qara qyz» atty áskerı dramasynyń kezekti sıýjetteri túsirildi.
Osylaısha keskindemeshi-sýretshiler sol kezdiń búkil ahýaly men beınesin tolyq berý úshin jazyq dalada II dúnıejúzilik soǵysy qarsańyndaǵy tutas bir aýyldy saldy. Munda ótken kúnderdiń kýásindeı eski toqal tamdardy, temirjol vokzalyn, klýb, mektep, poshta, dıirmendi tabýǵa bolady.
«Tyldaǵy eldiń tynys-tirshiligin beıneleıtin aýyldy turǵyzýǵa bir jarym aıdaı ýaqyt ketti. Bul óte qıyn boldy. Aıdalada, aınalada eshteńe joq, on shaqty adam jumys istedik. Aýyl ótken ǵasyrdyń 30-40 jyldaryndaǵy arhıvtik qujattar negizinde jasaldy. Bas-aıaǵy on bes ǵımarat saldyq», deıdi kartınanyń qoıýshy-sýretshisi Erken Súleımenov.
Qoıýshy-sýretshi Erken atalǵan fılmniń Soltústik Qazaqstan oblysyndaǵy túsirilim jumystaryna da qatysqan. Ol jerde Súleımenovtiń komandasy jertasalar, jattyǵý ortalyǵy, jaý komendatýrasy men aýrýhanany salǵan. Qoıýshy-sýretshi óziniń osy jumysyn bolashaq fılmderge arnalǵan dekorasııa retinde qaldyrǵysy keledi.
«Meniń bul salada júrgenime on shaqty jyl boldy. Kıno túsirilimderinen keıin ádette dekorasııany buzyp tastaǵanda ishiń kúıedi. Bul meniń ákemniń kindik qany tamǵan jer. Sondyqtan «Qara qyz» kartınasyna bola irgesi qalanǵan aýyldy keleshekte basqa kınorejısserlerge kómektesý úshin qaldyrǵym keledi. Ásirese jas stýdentter men olardyń dıplomdyq jumystary úshin de bul «aýyl» jaqsy bolar edi», deıdi Erken Súleımenov.
Sonymen «Qara qyz» – II dúnıejúzilik soǵysy kezindegi adamdardyń taǵdyryn baıandaıtyn áskerı drama. Fılmde soǵystyń barlyq taqsiretine qaramastan, birin-biri tabatyn keıipkerlerdiń oqıǵalary baıandalady.
Basty rólderde jas akterlar Nuraı Saqtapova men Erlan Qulmurzın oınady. Nuraı úshin bul kınodaǵy tyrnaqaldy róli, al Erlan telehıkaıalardan jıi kórinip júr.
«Meniń keıipkerim Asqarbek esimdi qarapaıym aýyl jigiti, soǵys jyldarynda ol maıdanǵa attanyp, batyldyqpen shaıqasady. Fılmde aýyr kórinister kóp, kórermenderdiń qyzyǵýshylyǵyn saqtap qalý úshin barlyq qupııalardy ashpaı-aq qoıaıyn», – deıdi Erlan Qulmurzın.
Sondaı-aq fılmge kópshilikke tanymal Dýlyǵa Aqmolda, Medǵat О́mirálıev syndy óner maıtalmandary da túsken. Kartınanyń negizgi túsirilimi 23 qyrkúıek pen 14 qazan aralyǵynda Soltústik Qazaqstan oblysynyń aýmaǵynda, Qyzyljar qalasynyń mańynda ótti. Al Aqshı aýylyndaǵy túsirilim 2 qarashada aıaqtaldy.
Mádenıet jáne sport mınıstrliginiń tapsyrysymen, Ulttyq kınony qoldaý memlekettik ortalyǵynyń kómegimen túsirilgen kartınanyń tusaýkeseri kelesi jyldyń kóktemine josparlanǵan.
ALMATY